بھارت اور چین کے درمیان ریاست اروناچل پردیش کے توانگ سیکٹر میں ہونے والی حالیہ جھڑپ میں دونوں اطراف کے فوجی معمولی زخمی ہوگئے تھے۔

غیر ملکی خبر رساں ادارے کے مطابق بھارت سے حالیہ جھڑپ کے بعد چین کی پیپلز لبریشن آرمی کے مغربی تھیٹر کمانڈر کا کہنا تھا کہ چینی فوجیوں کے معمول کی پیٹرولنگ میں رکاوٹ ڈالنے کے لیے بھارتی فوج نے لائن آف ایکچوئل کنٹرول کو غیر قانونی طور پر عبور کیا۔

انہوں نے بھارت پر زور دیا کہ وہ سرحد پر موجود اپنے فوجیوں کو قابو میں رکھے اور امن کو برقرار رکھنے کے لیے چین کا ساتھ دے۔

واضح رہے کہ جمعے کو بھارتی ریاست اروناچل پردیش میں لائن آف ایکچول کنٹرول پر بھارت اور چین کے درمیان جھڑپوں میں چند فوجی زخمی ہوگئے تھے جس کے بعد دونوں ممالک کی افواج پیچھے ہٹ گئی تھیں۔

اگرچہ دونوں طرف سے ہلاکتوں کی کوئی اطلاع نہیں ہے تاہم کم از کم 6 بھارتی فوجی زخمی ہونے کی تصدیق ہوئی ہے جب کہ جھڑپ میں زخمی ہونے والوں میں بھی بھارتی فوجیوں کی تعداد زیادہ ہے۔

بھارتی میڈیا کا دعویٰ ہے کہ تقریباً 300 چینی فوجی بڑی تیاری کے ساتھ آئے تھے لیکن انہیں امید نہیں تھی کہ بھارتی فوج بھی اچھی طرح سے تیار ہوگی۔

خیال رہے کہ اس سے قبل بھی دونوں ممالک کے درمیان لائن آف ایکچوئل کنٹرول پر جھڑپیں ہوچکی ہیں جس میں بھارت کو بھاری نقصان اٹھانا پڑا تھا۔

دونوں ممالک کے درمیان جھڑپوں کو آغاز اگست 2020 میں مشرقی لداخ کے رنچن لا کی طرف سے ہوا تھا۔