بھارت میں ہندو انتہا پسندوں کی خود ساختہ پولیس نے مسلمان لڑکے کو ہندو لڑکی کے ساتھ سفر کرنے پر پولیس کے حوالے کردیا۔

بھارت میں ہندو انتہا پسندوں کی خود ساختہ پولیسنگ کے اقدامات بڑھنے لگے ہیں جس میں زیادہ تر مسلمانوں کو نشانہ بنایا جارہا ہے۔

ایسا ہی ایک واقعہ بھارتی ریاست کرناٹک کے ضلع جنوبی کنڑا میں پیش آیا، جہاں انتہا پسند ہندو تنظیم بجرنگ دل کے کارکنوں نے ایک نوجوان ہندو لڑکی اور ایک مسلمان لڑکے کو ایک ساتھ بس میں سفر کرنے پران کا پیچھا کیا اورانہیں پولیس کے حوالے کردیا۔

پولیس کے مطابق ہندو لڑکی اپنے مسلمان دوست کے ساتھ منگلورو سے بنگلورو کی جانب ایک پرائیویٹ بس میں سوار تھی۔

پولیس کا کہنا ہے کہ بجرنگ دل کے کارکنوں کو جب ان کے بارے میں معلوم ہوا تو انہوں نے پہلے منگلورو میں بس کو روکنے کی کوشش کی لیکن جب وہ بس کو روکنے میں ناکام رہے تو انہوں نے کلادکا قصبے میں اپنے کارکنوں کو اطلاع دی۔

پولیس کے مطابق بجرنگ دل کے کارکنوں نے کلادکا کے قریب داسکوڈی میں بس کو روکا اور ان سے پوچھ گچھ کی۔

پولیس کا کہنا تھا کہ بعد ازاں انتہا پسندوں کی خود ساختہ اخلاقی پولیس نے دونوں کو ڈرایا دھمکایا اور بس سے نیچے اتار لیا جس کے بعد دونوں کو پولیس کے حوالے کردیا۔