بھارتی طالب علم نے سنسکرت کا ڈھائی ہزار سال پرانا معمہ حل کردیا ہے جس کی وجہ سے بڑے بڑے عالم بھی پریشان تھے۔

غیر ملکی خبر رساں ادارے کے مطابق برطانیہ کی کیمرج یونیورسٹی میں پی ایچ ڈٰی کے طالب علم 27 سالہ رشی راجپوپات نے سنسکرت زبان کی گرائمر کا ایک ایسا معمہ حل کیا ہے جو تقریباً ڈھائی ہزار سال پرانا ہے۔

رشی راجپوپات نے سنسکرت زبان کے جس اصول کی گتھی سلجھائی ہے اس کے بانی مشہور استاد پانینی تھے، جنہوں نے تقریباً ڈھائی ہزار سال قبل یہ اصول وضع کیے تھے۔

پانینی کی وضع کردہ گرائمر کو استاد ھائی کہا جاتا ہے اور یہ نظام الگورتھم جیسے اصولوں پر کام کرتا ہے جس میں ہر لفظ ایک سابقے اور لاحقے سے مل کربنتا ہے جس کے بعد ہی کوئی معنی خیز لفط یا فقرہ بنتا ہے۔

پانینی کے گرائمر میں اکثر لفظ پر دو یا دو سے زائد اصولوں کا اطلاق ہوتا ہے جس کا مطلب اکثر ماہرین یہ نکالتے رہے ہیں کہ اگر کسی لفظ میں گرائمر کے دو برابر اصولوں کا ٹکراؤ ہوجائے تو جیت بعد والے اصول کی ہوتی ہے۔

لیکن رشی راجپوپات نے پانینی کے اس بڑے اصول کی تشریح کو رد کردیا ہے، ان کا کہنا ہے کہ پہلے اور بعد والی تشریح درست نہیں بلکہ پانینی لفظ کے دائیں اور بائیں جانب والے اصولوں کی بات کررہے تھے۔

رشی راجپوپات نے بتایا کہ پانینی کے اصول کے مطابق اگر کسی لفظ میں گرائمر کے دو اصولوں میں ٹکراؤ ہوجائے تو بائیں طرف والے اصول کو دائیں جانب والے پر ترجیح دی جائے گی۔

رشی راجپوپات نے پانینی کی اس لینگویج مشین کا بھی سراغ  لگالیا ہے جس کے ذریعے سنکسرت کے تقریباً تمام الفاظ گرائمر کے اصولوں پر پورے اترے ہیں۔

اس موقع پر رشی راجپوپات کہتے ہیں کہ ’مجھے امید ہے کہ یہ دریافت بھارتی طالب علموں میں فخر، اعتماد اور امید کی ایک نئی روح پھونکے گی‘۔