حج کے خواہشمند پاکستانیوں کیلئے سعودی عرب کی جانب سے اہم اعلان کیا گیا ہے۔

وزارت مذہبی امور کے مطابق وزیر مذہبی امور مفتی عبدالشکور سعودی عرب کی دعوت پر 4 روزہ عالمی حج کانفرنس میں شرکت کیلئے جدہ گئے جہاں انہوں نے سعودی ہم منصب ڈاکٹر توفیق بن الربیعہ سمیت کئی اہم شخصیات سے ملاقاتیں کیں اور اداروں کا دورہ کیا۔

وزارت مذہبی امور کا اپنے اعلامیے میں کہنا ہے کہ سعودی حکام کی جانب سے وزیر مذہبی امور کو سالانہ حج معاہدے کا مسودہ موصول ہوگیا، جس کے تحت پاکستان کا ایک لاکھ 79 ہزار 210 حجاج کا پرانا کوٹہ بحال جبکہ 65 سال کی بالائی حد کو بھی ختم کردیا ہے۔

وزارت کے مطابق رواں سال حج درخواستیں فروری کے آخر تک طلب کئے جانے کا امکان ہے جبکہ کابینہ کی منظوری کے بعد وفاقی وزیر مذہبی امور حتمی حج پالیسی 2023ء کا اعلان کرینگے۔

سعودی وزیر حج و عمرہ توفیق الربیعہ کا کہنا ہے کہ حج معاہدے پر پاکستان، بھارت، ایران، ترکیہ، سوڈان، یمن، ازبکستان، ملائیشیا اور بحرین سمیت 19 ممالک شامل ہیں۔

انہوں نے کہا کہ معاہدے میں عازمین کی تعداد، آمد، روانگی اور پیش کی جانے والی خدمات کا ذکر ہے۔

سعودی وزیر حج و عمرہ توفیق الربیعہ سے 12 ممالک کے وزراء پر مشتمل وفد نے ملاقات کی، جس میں انہیں عازمین حج کو پیش کی جانیوالی نئی سہولتوں سے متعلق تفصیلات بھی بتائی گئیں۔

وزارت حج کا کہنا ہے کہ پاکستان سے پہلی حج پرواز یکم ذوالقعدہ کو روانہ ہوگی اور رہائش کا اعلان 15 شعبان کو کیا جائیگا، خوراک اور ٹرانسپورٹ کا معاہدہ 15 رجب سے پہلے مکمل ہوگا۔

حکام کے مطابق 50 فیصد حجاج مدینہ ایئر پورٹ اور 50 فیصد جدہ ایئرپورٹ پر اتاریں جائیں گے۔