سوئیڈن میں قوانین کی ترمیم کے بعد سال 2023 کے آغاز کے ساتھ ہی چند قوانین نافذ العمل ہوگئے ہیں۔

نئے قوانین کی ترمیم کے بعد سوئیڈن میں 2 جنوری سے پالتو بلیوں کی رجسٹریشن لازمی قرار دے دی گئی ہے۔

اس وقت سوئیڈں میں تقریباً 7 لاکھ بلیاں بطور پالتو جانور لوگوں کے گھروں میں موجود ہیں، ان تمام بلیوں کو چپ لگوانا اور متعلقہ ادارے میں رجسٹرڈ کروانا لازمی قرار دیا گیا ہے۔

تمباکو اور دیگر قانونی نشہ اور اشیاء پر ٹیکس بڑھا دیا گیا ہے، سوئیڈش تمباکو (اسنوس) اور سگریٹ کے پیکٹ پر 1 کرونا ٹیکس بڑھایا گیا ہے۔

ماحولیاتی آلودگی کے تحفظ کے لئے بجلی سے چلنے والی کاروں پر ٹیکس کی چھوٹ کو ختم کردیا گیا ہے جب کہ ذاتی مکانات کی تزئین و آرائش یا مرمت کے لیے ایسوسی ایشنز کی اجازت درکار ہوگی۔

ایسوسی ایشنز اصول وضع کریں گے کہ کس طرح  تزئین اور آرائش یا مرمت کی جائے۔ پینشن کی کم سے کم عمر 62 سال سے بڑھا کر 63 سال کردی گئی ہے، اگر کوئی پینشن کی عمر کے بعد بھی کام کرنا چاہے تو وہ 69 سال کی عمر تک کام کرسکتا ہے۔

نئے ترمیم شدہ قوانین کے مطابق گاڑی سیکھتے وقت شناختی دستاویز ساتھ ہونا لازم قرار دیا گیا ہے بصورتِ دیگر جرمانہ عائد ہوگا۔

ڈرائیونگ ٹیسٹ میں نقل کرنے والوں کو کم ازکم 1 سال اور زیادہ سے زیادہ 2 سال تک ٹیسٹ میں شرکت پر پابندی کا سامنا کرنا پڑسکتا ہے۔

یونیورسٹی میں داخلے کے ٹیسٹ کے لیے طلبہ کی جامعہ تلاشی لی جائے گی جب کہ ٹیسٹ کی فیس 450 سے بڑھا کر 550 کردی گئی ہے۔

سی ایس این کے قرضوں پر سود کی شرح میں اضافہ کردیا گیا ہے جس کے بعد طلبہ اب پڑھائی کے قرضوں پر 0.59 فیصد سود ادا کریں گے۔

ٹی وی اور ریڈیو لائسنس کی فیس کم کردی گئی ہے، اب عوام کو 1300 کرونا فی کس سالانہ ٹی وی اور ریڈیو لائسنس کی مد میں ادا کرنا ہوگا جب کہ پیٹرول اور ڈیزل کی قیمتوں میں فی لیٹر 1 کرونا کم کیا گیا ہے۔