سابق برطانوی سیکریٹری خارجہ جیک اسٹرا نے بھارتی وزیر اعظم نریندر مودی کو براہ راست گجرات قتل عام کا ذمہ دار قرار دے دیا۔

برطانوی نشریاتی ادارے کی ایک دستاویزی رپورٹ میں  سابق برطانوی سیکریٹری خارجہ جیک اسٹرا نے تصدیق کی کہ  گجرات نسلی فسادات پر 2002 کی ٹونی بلئیر حکومت نے غیر معمولی تحقیقات کروائی تھیں۔

جیک اسٹرا کا کہنا تھا کہ  ٹونی بلئیر حکومت نے تحقیقات برطانیہ میں قابل ذکر گجراتی نژاد مسلمانوں کے دباؤ پر کروائیں۔ برطانیہ میں موجود ہزاروں گجراتی مسلمانوں کے گجرات میں مسلم نسل کشی پر شدید تحفظات تھے۔

مزید پڑھیں: بھارتی ہٹلر ’مودی‘ کی اصل حقیقت بھارتی انتہا پسند سوشل میڈیا صارفین کو ہضم نہ ہوئی

انہوں نے کہا کہ 2002  میں بھارت میں برطانوی ہائی کمیشن نے غیر معمولی تحقیقات کے بعد رپورٹ برطانوی وزارت خارجہ کو بھجوائی تھی۔

سابق برطانوی سیکریٹری خارجہ نے کہا کہ برطانوی ہائی کمیشن کی رپورٹ میں اس وقت گجرات کے وزیر اعلیٰ و موجودہ بھارتی وزیر اعظم نریندر مودی کو براہ راست گجرات میں مسلم کش فسادات کا ذمہ دار قرار دیا گیا تھا۔

جیک اسٹرا نے کہا کہ   رپورٹ میں مودی کو نسلی قتل عام و فسادات کا ہالمارک قرار دیا گیا تھا۔

ان کا مزید کہنا تھا کہ  رپورٹ میں نریندر مودی کی 27 فروری کو بھارتی سینئر پولیس حکام سے ملاقات کا انکشاف کیا گیا تھا جس میں انہوں نے پولیس افسران کو فسادات میں مداخلت سے روک دیا تھا۔

مزید پڑھیں: گجرات فسادات کیس: بھارتی سپریم کورٹ نے بھی مودی کو کلین چٹ دے دی

سابق برطانوی سیکریٹری خارجہ نے کہا کہ  رپورٹ ملنے کے بعد اس وقت کی واجپائی حکومت اور بھارتی وزیر خارجہ جسونت سنگھ سے رابطے  کیے ۔ بھارتی وزارت خارجہ نے برطانوی نشریاتی ادارے کی دستاویزی رپورٹ کو پروپیگنڈا قرار دیا ۔

خیال رہے کہ  وزیر خارجہ بلاول بھٹو نے بھی حالیہ اقوام متحدہ کانفرنس میں مودی کو گجرات کا قصائی قرار دیا تھا۔ بھارتی مسلمان رہنما اسد الدین اویسی نے بھی برطانوی نشریاتی ادارے کی رپورٹ پر نریندر مودی کو شدید تنقید کا نشانہ بنایا ہے۔

واضح رہے کہ  نریندر مودی گجرات میں مسلم کش فسادات کے دوران ریاست کے وزیر اعلیٰ تھے۔ مودی کی سرپرستی میں گجرات کے مسلم کش فسادات میں ہزاروں مسلمانوں کا قتل عام کیا گیا تھا۔