مائیکرو سافٹ کے شریک بانی بل گیٹس نے کہا ہے کہ دنیا کسی نئی عالمی وبا سے نمٹنے کے لیے تیار نہیں۔

بل گیٹس نے آسٹریلیا کے شہر سڈنی میں ایک انسٹیٹیوٹ کی تقریب سے خطاب کرتے ہوئے کہا کہ مستقبل میں عالمی وبا کا مقابلہ کرنے کے لیے مضبوطی سیاسی تعاون کی ضرورت ہوگی یہاں تک کہ دشمنوں کو بھی ایک دوسرے کے ساتھ کام کرنا ہوگا۔

ان کا کہنا تھا کہ وہ یہ نہیں کہہ سکتے کہ کووڈ 19 کے حوالے سے کسی ملک کا ردِ عمل بالکل درست تھا۔

انہوں نے کہا کہ مستقبل میں عالمی وباؤں سے نمٹنے کے لیے مشترکہ سیاسی عزم پر مبنی ٹھوس عالمی تعلقات کی ضرورت ہوگی، مگر ابھی اس حوالے سے عالمی تیاری نظر نہیں آتی۔

یہ بھی پڑھیں: دنیا کے امیر ترین افراد میں شامل بل گیٹس کس اسمارٹ فون کو استعمال کرتے ہیں؟

بل گیٹس کا کہنا تھا کہ جب ہمیں کسی وبائی مرض سے خطرہ لاحق ہو تو ہمیں اس انداز سے ردِ عمل ظاہر کرنا ہوگا کہ وہ بیماری عالمی سطح پر پھیل نہ سکے۔

ان کا کہنا تھا کہ ہمیں ہر 5 سال بعد ممالک اور خطے کی سطح پر وباؤں سے نمٹنے کی تیاریوں کی آزمائش کرنے کی ضرورت ہے اور ایک ایسا عالمی گروپ بھی قائم ہونا چاہیے جو ہر ملک کی کوششوں پر نظر رکھے۔

انہوں نے توقع ظاہر کی کہ ٹیکنالوجی میں تنوع سے متعدد طبی اور دیگر مسائل سے نمٹنا ممکن ہوجائے گا۔

یہ بھی پڑھیں: 114 ارب ڈالرز کے مالک بل گیٹس کا پسندیدہ مشغلہ کیا ہے؟

انہوں نے کہا کہ ہم موٹاپے کا علاج کرسکیں گے، ہم کینسر کا علاج کرسکیں گے، ہم پولیو کا خاتمہ کرسکیں گے۔

بل گیٹس کا کہنا تھا کہ میرا ماننا ہے کہ 20، 40 یا 60 سال پہلے کے مقابلے میں اب پیدا ہونا زیادہ بہتر ثابت ہوگا۔

یہ بھی پڑھیں: بل گیٹس اربوں افراد کے کس مسئلے کو حل کرنے کی کوشش کررہے ہیں؟