ترجمان امریکی محکمہ خارجہ نیڈ پرائس کا کہنا ہے کہ جمہوری اور خوشحال پاکستان ہمارے مفادات کے لیے اہم ہے۔

واشنگٹن میں پریس کانفرنس کے دوران ترجمان امریکی محکمہ خارجہ نیڈ پرائس نے سابق وزیر اعظم عمران خان کے بدلتے بیانات پر رد عمل دیتے ہوئے کہا کہ ان کے الزام تراشی کے کھیل کے ارتقاء پر تبصرہ نہیں کروں گا۔

نیڈ پرائس نے کہا کہ ستم ظریفی کے الزامات آنے کے بعد اس پر کئی بار بات ہوئی، ان الزامات میں کبھی کوئی حقیقت نہیں تھی۔

یہ بھی پڑھیں: پاکستان کو 200 ملین ڈالرز کی امداد پر چیک اینڈ بیلنس رکھیں گے، نیڈ پرائس

انہوں نے کہا کہ  پاکستان کے ساتھ دیرینہ تعلقات کو اہمیت دیتے ہیں، جمہوری اور خوشحال پاکستان ہمارے مفادات  کے لیے اہم ہے۔ پرو پیگنڈا اور غلط معلومات کو دو طرفہ تعلقات میں حائل نہیں ہونے دیں گے۔

ترجمان امریکی محکمہ خارجہ کا کہنا تھا کہ ہم پاکستان میں کسی سیاسی رہنما یا سیاسی جماعت کو کسی پر فوقیت نہیں دیتے۔

نیڈ پرائس سے سوال کیا گیا کہ  کیا پاکستان اور امریکہ کے درمیان معطل شدہ سیکیورٹی تعاون بحال ہورہا ہے جس پر انہوں نے کہا کہ سیکیورٹی تعاون کی بحالی پر عوامی طور پر کچھ نہیں کہوں گا۔

یہ بھی پڑھیں: قرآن پاک کی بے حرمتی قابل مذمت، مکروہ اور نفرت انگیز ہے، نیڈ پرائس

ان کا مزید کہنا تھا کہ پاکستان امریکہ کا قابل قدر شراکت دار ہے، پاکستان کے ساتھ سیکیورٹی تعلقات ہمارے  لیے اہم ہیں۔پاکستان  کے لیے موجود خطرات ہمارے لیے بھی خطرہ ہیں۔

بھارت میں بی بی سی کے دفاتر پر چھاپوں  سے متعلق سوال پر انہوں نے کہا  دہلی میں بی بی سی کے دفاتر کی تلاشی کی رپورٹ سے آگاہ ہیں۔

نیڈ پرائس نے کہا کہ ہم  دنیا بھر میں میڈیا کی آزادی کی حمایت کرتے ہیں۔ اظہار رائے کی آزادی پر بات کرتے رہیں گے۔