امریکہ میں ایک سیاہ فام ٹائر نکولز پر جان لیوا تشدد کے الزام میں 6 پولیس اہلکاروں کو برطرف کر دیا گیا ہے۔

29 سالہ سیاہ فام شخص کی موت پر پانچ دیگر افسران کو پہلے ہی برطرف کیا گیا تھا اور ان پر قتل کا الزام عائد کیا گیا تھا۔

غیر ملکی میڈیا کی رپورٹ کے مطابق میمفس پولیس ڈیپارٹمنٹ نے کہا کہ اس نے 29 سالہ افریقی امریکی ٹائر نکولز پر جان لیوا تشدد میں ملوث 6 پولیس اہلکاروں کو برطرف کر دیا ہے.

برطرف ہونے والے ایک پولیس اہلکار پریسٹن ہیمفل، جو 2018 سے جنوبی امریکی شہر کی پولیس فورس میں تھا اس سے قبل بھی متعدد محکمانہ پالیسیوں کی خلاف ورزی کر چکا تھا جس میں ذاتی طرز عمل، سچائی اور ٹیزر گن کے استعمال سے متعلق ضوابط شامل ہیں۔

واضح رہے کہ میمفس پولیس ڈپارٹمنٹ نے ٹائر نکولز کی موت پر پانچ دیگر افسران کو پہلے ہی برطرف کیا گیا تھا اور ان پر قتل کا الزام لگایا گیا تھا۔

ایک خبر رساں ادارے کے مطابق برطرف پولیس اہلکار پریسٹن ہیمفل کی نمائندگی کرنے والے ایک وکیل لی جیرالڈ نے ٹیلی فون پر کہا کہ اگرچہ ہم اس برطرفی سے متفق نہیں ہیں، لیکن پریسٹن ہیمفل ٹائر نکولز کی موت کی تحقیقات میں تمام حکام کے ساتھ تعاون جاری رکھیں گے۔

برطانوی خبر رساں ادارے کی رپورٹ کے مطابق پریسٹن ہیمفل، کو محکمے کی تحقیقات کے آغاز سے قبل ہی معطل کر دیا گیا تھا.

واضح رہے کہ ٹائر نکولز کو اسکورپین نامی خصوصی پولیس یونٹ کے ارکان نے 7 جنوری کو پولیس کے مطابق ٹریفک کی خلاف ورزی کرنے پر گرفتار کیا تھا۔

ٹائر نکولز پر پولیس اہلکاروں کے بہیمانہ تشدد کی فوٹیج، باڈی کیمروں اور سیکیورٹی کیمروں پر ریکارڈ کی گئی، جب گزشتہ ہفتے اسے عام کیا گیا تو عوامی سطح پر شدید غم و غصے کو جنم دیا۔