بھارتی تاجر نے کروڑوں روپے مالیت کی قیمتی رولس روئس گاڑی عام ٹیکسی میں تبدیل کرلی۔

بھارتی میڈیا رپورٹس کے مطابق ریاست کیرلہ سے تعلق رکھنے والے چھیمانور جیولر گروپ کے چیئرمین ڈاکٹر بوبی چھیمانور نے کروڑوں روپے مالیت کی رولس روئس فینٹم گاڑی ٹیکسی میں بدل ڈالی۔

اس ٹیکسی کو لوگ کرائے پر استعمال بھی کر سکتے ہیں تاہم رولس روئس کی وجہ سے اس کا کرایہ دیگر ٹیکسیوں سے زیادہ ہے۔

رپورٹ میں بتایا گیا کہ رولس روئس ٹیکسی کا ایک دن کا کرایہ 25 ہزار بھارتی روپے رکھا گیا ہے۔

اس حوالے سے ڈاکٹر بوبی کا کہنا ہے کہ لوگ میری گاڑی کو عجیب عجیب نظروں سے دیکھتے تھے جو مجھے بالکل بھی اچھا نہیں لگتا تھا، یہی وجہ ہے کہ میں نے اپنی گاڑی کو ٹیکسی میں بدلنے کا فیصلہ کیا۔

انہوں نے بتایا کہ رولس روئس فینٹم گاڑی کا ٹیکسی میں تبدیل ہونے سے پہلے سیاہ رنگ تھا جس کو اب تبدیل کروا کر گولڈن کروا دیا گیا ہے اور گاڑی کے اوپر ٹیکسی لائٹ بھی لگوا دی تاکہ لوگ اسے پہچاننے میں ہچکچاہٹ کا شکار  نہ ہوں۔

بھارتی تاجر نے ٹیکسی کو گولڈ شیریٹ کا نام دیا ہے جس کا نمبر بھی بہت خاص یعنی 0001 ہے

واضح رہے کہ چھیمانور جیولر گروپ کا کاروبار بھارت سمیت کئی ممالک میں ہے اور ڈاکٹر بوبی کا شمار ریاست کیرلہ کی مشہور کاروباری شخصیات میں ہوتا ہے۔