الجزائر میں ایک مسجد کے امام کے کاندھے پر تراویح کی نماز کے دوران بلی کے چڑھنے کی ویڈیو سوشل میڈیا پر وائرل ہوگئی جس کے بعد امام الشیخ ولید مہساس کا اہم بیان سامنے آ گیا ہے۔

عرب میڈیا کے مطابق امام الشیخ ولید مہساس نے سوشل میڈیا پر ایک ویڈیو بیان جاری کیا جس میں اُن کا کہنا تھا کہ نماز میں بلی کا یہ واقعہ ’بے ساختہ‘ تھا، میرا مشورہ ہے کہ اس واقعے کو ایسے ہی رہنے دیا جائے۔

انہوں نے کہا کہ اسلامی دنیا اور دیگر جگہوں پر مسلمان بھائیوں اور بہنوں کا شکریہ ادا کرتا ہوں جنہوں نے میرے بارے میں اچھی رائے قائم کی۔

ان کا کہنا تھا کہ دینِ اسلام جانوروں اور دیگر مخلوقات کے ساتھ حسنِ سلوک اور مہربانی کا حکم دیتا ہے۔

امام الشیخ ولید مہساس نے کہا کہ انہوں نے کسی میڈیا آؤٹ لیٹ کو کوئی بیان نہیں دیا اور نہ ہی وہ ایسا کریں گے کیونکہ ان کے لیے یہ معاملہ عام اور خود ساختہ ہے اور اس میں بات کرنے کے لیے کچھ نہیں ہے۔

واضح رہے کہ چند روز قبل قاری ڈاکٹر ولید مہساس کی نماز تراویح کی ایک حالیہ ویڈیو خوب وائرل ہوئی تھی جس میں قیام کے دوران ایک بلی چھلانگ لگا کر ان کے کاندھے پر جا بیٹھی تھی۔

A cat jumped on an Imam as he recited a Ramadan prayer during a live broadcast in Algeria 🐈 pic.twitter.com/hYzbYFW013

— Al Jazeera English (@AJEnglish) April 5, 2023

انہوں نے بلی کو کاندھے سے اتارنے کی کوئی کوشش نہیں کی بلکہ سکون سے قرأت جاری رکھی۔ بلی نے امام صاحب کے چہرے کے ساتھ اپنا منہ لگایا اور ان کے رکوع میں جانے سے پہلے کاندھے سے اتر گئی۔