گزشتہ دو دہائیوں میں بھارتی بحریہ بھارتی عوام پر بوجھ بن گئی  ہے۔

بھارتی میڈیا کی رپورٹ کے مطابق 2000 سے لے کر اب تک بھارتی بحریہ 26 بڑے حادثات کا شکار ہو چکی ہے۔

رپورٹ میں کہا گیا ہے کہ  بھارتی بحریہ ہر 5 سال میں  ایک جنگی جہاز اور ہر  2 سال میں ایک تربیت یافتہ افسر یا جوان غفلت کے باعث کھو دیتی ہے۔

زیادہ تر حادثات کپتان کی غفلت، غیر معیاری دیکھ بھال اور ناکافی تربیت کے باعث پیش آئے۔ صرف 2014 کے 7 مہینوں میں 11  حادثات میں بھارتی بحریہ کے 21 افسران  و جوان ہلاک ہوئے۔

8 مارچ 2023 کو بھارتی بحریہ کا ہیلی کاپٹر بحیرہ عرب میں  گر کر تباہ ہوا۔18 جنوری 2022 کو  آئی این ایس  رنویر پر دھماکے کے نتیجے میں 3 سیلرز ہلاک ہوئے۔

اکتوبر 2017 میں واحد بھارتی نیوکلیئر سب میرین غفلت کے باعث حادثے کا شکار ہوگئی۔

فروری 2014 میں بھارتی سب میرین سندھو رَتنا میں آگ لگنے سے 2 افسران سمیت 7 سیلرز جان سے ہاتھ دھو بیٹھے۔ سَب میرین حادثے کے نتیجے میں بھارتی نیول چیف ڈی کے جوشی کو استعفیٰ دیناپڑا تھا۔

گزشتہ 6 برسوں کے دوران پاکستان 4 مرتبہ بھارتی آبدوزوں کا پاکستانی پانیوں میں سُراغ لگا کر بھارتی بحریہ کی ناقص کارکردگی کا ثبوت دُنیا کے سامنے رکھ چکا ہے۔

رپورٹ میں سوال اٹھایا گیا کہ  کیا حادثات کا شکار بھارتی فوج چین یا پاکستان سے لڑ بھی پائے گی؟