امام کعبہ شیخ ڈاکٹرعبدالرحمٰن السدیس کو مسجد الحرام اور مسجد نبویؐ مذہبی امور انتظامیہ کا سربراہ بدرجہ وزیر مقرر کر دیا گیا ہے۔

سعودی میڈیا کے مطابق ایوان شاہی نے منگل کو ایک فرمان جاری کیا جس میں کہا گیا تھا کہ سعودی عرب کے شاہ سلمان بن عبدالعزیز نے ڈاکٹرعبدالرحمٰن بن عبدالعزیز السدیس کو مسجد الحرام اور مسجد نبوی مذہبی امور انتظامیہ کا سربراہ بدرجہ وزیر مقرر کیا۔

ایک اور شاہی فرمان کے ذریعے وزیر حج وعمرہ ڈاکٹر توفیق الربیعہ کو مسجد الحرام اور مسجد نبوی کے امور کے لیے جنرل اتھارٹی کے بورڈ آف ڈائریکٹرز کا چیئرمین مقرر کیا گیا۔

ایوان شاہی کی جانب سے متعلقہ اداروں کو ہدایت کی گئی ہے کہ وہ شاہی فرمان پرعمل درآمد کا اہتمام کریں۔

خیال رہے کہ سعودی کابینہ کی جانب سے مسجد الحرام و مسجد نبوی مذہبی امور کی پریذیڈنسی کے نام سے دو نئے خودمختار اداروں کے قیام کا فیصلہ کیا گیا ہے۔

مسجد الحرام اور مسجد نبوی مذہبی امور پریذیڈنسی کے نام سے خودمختار ادارہ انتظامی اعتبار سے براہ راست بادشاہ  کے ماتحت ہوگا، تاہم حرمین شریفین میں آئمہ اور موذن  کے امور کی نگرانی اور دونوں مساجد میں مذہبی امور سے متعلق تمام معاملات، اختیارات اور فرائض نئے ادارے کو منتقل ہوجائیں گے۔

حرمین شریفین جنرل پریذیڈنسی سے منسلک علمی اسباق اور وعظ و نصیحت کی مجالس کے انتظامات بھی نئے ادارے کے حوالے کیے گئے ہیں۔

اس کے علاوہ سعودی کابینہ کی جانب سے مسجد الحرام و مسجد نبوی امور کی جنرل پریذیڈنسی کو مسجد الحرام و مسجد نبوی امور کی نگران جنرل اتھارٹی میں تبدیل کرنے کا بھی فیصلہ کیا گیا ہے۔

دوسری جانب مسجد الحرام اور مسجد نبوی مذہبی امور کے ادارے کا سربراہ بدرجہ وزیر مقرر کیے جانے پر شیخ ڈاکٹر عبدالرحٰمن السدیس کی جانب سے شاہ سلمان بن عبدالعزیز اور ولی عہد شہزادہ محمد بن سلمان کے لئے ممنونیت کے جذبات کا اظہار کیا گیا ہے۔

عرب میڈیا کی رپورٹ کے مطابق ڈاکٹرعبدالرحمٰن السدیس نے کہا کہ شاہی اعتبار کا تقاضا ہے کہ ہم مذہبی امور کے ادارے کو جدید تر بنانے اور حرمین شریفین کا پیغام پوری دنیا تک پہنچانے کے لئے مزید جدوجہد کریں۔

انہوں نے مزید کہا کہ نیا شاہی فرمان حرمین شریفین سے سعودی ریاست کے حکمرانوں کی عقیدت کے طویل سلسلے کا حصہ ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں