بیروت: داعش نے گھات لگا کر شامی فوج کی بس پر حملہ کردیا جس کے نتیجے میں 26 اہلکار جاں بحق ہوگئے ہیں۔

عالمی خبر رساں ادارے کی رپورٹ کے مطابق داعش نے گھات لگا کر شامی فوج کی بس پر حملہ کیا ہے جس کے نتیجے میں 26 اہلکار ہلاک اور متعدد زخمی ہوگئے ہیں۔

رپورٹ کے مطابق شام کے صوبے دیر الزور کی معروف شاہراہ سے شامی فوجیوں کی بس گزر رہی تھی جسے داعش جنگجوؤں نے گھیرلیا اور اندھا دھند فائرنگ کردی۔

رپورٹ میں کہا گیا ہے کہ شامی فوج کو گھات لگا کر نشانہ بنایا گیا تھا جب کہ حملہ اتنا اچانک تھا کہ کسی کو سنبھلنے کا موقع تک نہیں ملا۔

شامی فوج کی بس گولیوں سے چھلنی ہوگئی جس میں 26 اہلکار جاں بحق اور 10 سے زائد زخمی ہوگئے ہیں جن میں سے کچھ کی حالت تشویشناک بتائی جارہی ہے۔

واضح رہے کہ داعش نے 2019 سے شام میں اپنے آخری علاقے کو کھونے کے باوجود بھی وسیع صحرا میں اپنے ٹھکانے بنائے رکھے ہیں، جہاں سے انہوں نے گھات لگاکر حملہ کیا ہے۔

رپورٹ میں مزید کہا گیا ہے کہ شام کی حکومتی افواج اور ان کے اتحادی ایران نواز مسلح گروپس علاقے میں تعینات ہیں جو جمعہ کی صبح سے ہائی الرٹ تھے۔

جنگ کو مانیٹر کرنے والے رامی عبدالرحمان کا کہنا ہے کہ داعش نے حال ہی میں اپنے مہلک فوجی حملوں میں اضافہ کیا ہے جس کا مقصد زیادہ سے زیادہ ہلاکتیں کرنا ہے۔

انہوں نے کہا کہ ایسا کرکے جہادی یہ ظاہر کرنے کی کوشش کر رہے ہیں کہ داعش ’’اپنے رہنماؤں کو نشانہ بنانے کے باوجود بھی اب بھی فعال اور طاقتور ہے‘‘۔

یاد رہے کہ گزشتہ ہفتے داعش نے اپنے رہنما ابوالحسین الحسینی القرشی کی ہلاکت کا اعلان کیا تھا جو شام کے شمال جھڑپوں میں مارا گیا تھا۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں