اسپین میں ایک خاتون فٹ بالرکو فٹ بال فیڈریشن کے صدر کی جانب سےبوسہ دینے کے اسکینڈل کے بعد جنسی ہراسانی کے ایک تازہ واقعے نے ملک بھر میں غم وغصے کی لہر دوڑا دی ہے۔

تازہ واقعے میں ایک خاتون رپورٹر کو لائیو کوریج کے دوران ایک شخص نے چھونے کی کوشش کی جس پر اسے گرفتار کرلیا گیا ہے۔

یہ واقعہ گزشتہ منگل کو پیش آیا جب کیوٹرو چینل کی رپورٹر عیسیٰ بالادو میڈرڈ میں ایک ڈکیتی کی کوریج کر رہی تھیں۔

سوشل میڈیا پر پوسٹ کی گئی ایک ویڈیو میں دیکھا جا سکتا ہے کہ ملزم بالادو کے پیچھے آیا اور ان کے جسم پر ہاتھ رکھ کر ان سے اس ٹی وی چینل کے بارے میں پوچھا جس کے لیے وہ کام کرتی تھیں۔

بالادو جو اس وقت آن ایئر تھیں اور انہوں نے اس شخص کو ایک طرف دھکیلنے اور اپنی رپورٹ جاری رکھنے کی کوشش کی۔

دوسری جانب اسٹوڈیو میں موجود نیوزکاسٹر ناچو آباد نے بالادو کو روک کر پوچھا کہ کیمرے میں دکھائی دینے والا یہ شخص کون ہے؟

صحافی کی جانب سے ملزم کو وہاں سے ہٹانے کی بار بار کی کوشش ناکام ہونے کے بعد کیمرہ مین نے کیمرہ اس شخص کی طرف موڑ دیا۔

ملزم نے اس کے جسم کو چھونے سے انکار کیا تاہم کہا کہ وہ وہاں سے جا رہا تھا لیکن اس کے بال اس کے ہاتھ میں پھنس گئے۔

اس شخص کو لائیو ٹیلی ویژن پر ایک خاتون رپورٹر کے ساتھ جنسی طور پر ہراساں کرنے کے الزام میں گرفتار کرلیاگیا ہے۔

پولیس نے ایکس پلیٹ فارم پرویڈیو پوسٹ کی ہے جس میں اس شخص کوخاتون رپورٹر کو ہراساں کرتے دیکھا جا سکتا ہے۔

ہراسانی کا شکار ہونے والی رپورٹر کے ساتھ عوامی حلقوں کی طرف سے یکجہتی کا اظہار کیا جا رہا ہے جبکہ ٹی وی چینل کے مالک نے بھی اس کے ساتھ مکمل ہمدردی کا اظہار کیا ہے۔