فلسطینی سفر ریاض منصور نے اقوام متحدہ کی جنرل اسمبلی سے خطاب کرتے ہوئے عالمی برادری سے اسرائیل کی جانب سے قتل عام کو روکنے کے لیے ووٹ دینے کی اپیل کردی۔

اقوام متحدہ میں فلسطینی سفیر ریاض منصور نے جنرل اسمبلی کے ہنگامی اجلاس سے خطاب کرتے ہوئے کہا ’’غزہ میں لاکھوں فلسطینیوں کے گھروں کو تباہ کردیا گیا ہے، لاکھوں فلسطینی بے گھر ہیں اور اسرائیل مزید تباہی کررہا ہے‘‘۔

انہوں نے کہا ’’کوئی خاندان ایسا نہیں بچا جس نے موت کو گلے نہ لگایا ہو، غزہ میں کئی تو ایسے خاندان ہیں جن کا نام و نشان تک مٹادیا گیا جب کہ کچھ لوگ فلسطینیوں کی نسبت اسرائیلیوں کے لیے درد کیوں محسوس کرتے ہیں‘‘۔

انہوں نے سوال اٹھایا ’’فلسطینیوں کی اموات پرخاموشی کیوں ہے؟ کیا ہمارا رنگ اور قومیت الگ ہے، ہمارے قتل عام پرفوری احساس اور افسوس کیوں نہیں ہوتا؟‘‘

ریاض منصور کہتے ہیں کوئی بھی چیزکسی بھی ملک کوجنگی جرائم کا جوازفراہم نہیں کرسکتی، اسرائیل آسمان سے آگ برسا رہا ہے اور کوئی بھی فلسطینی اپنی زمین پرمحفوظ نہیں۔ تمام لوگوں سے گزارش ہے فلسطینیوں سے متعلق الفاظ کا درست استعمال کریں۔

فلسطینی سفیر نے کہا کہ عالمی برادری سے اپیل کرتا ہوں اسرائیلی دہشت گردی بند کرائی جائے، غزہ کی پٹی میں 16 سال کی طویل ناکہ بندی ہے۔ مصائب اور تمام مشکلات کے باوجود فلسطینی اپنی زندگی گزار رہے ہیں۔

ان کا کہنا تھا ’’اپیل کرتا ہوں اسرائیل کی جانب سے قتل عام کو روکنے کے لیے ووٹ دیں، اپیل کرتا ہوں اسرائیل کے پاگل پن کو روکنے کے لیے ووٹ دیں۔ جنرل اسمبلی کے پاس موقع ہے انصاف کا انتخاب کریں، انتقام کا نہیں‘‘۔

فلسطینی سفیر نے مزید کہا کہ قانون کا دفاع کرنے کا انتخاب کریں، خلاف ورزی کا جواز پیش نہ کریں، جنرل اسمبلی سے اپیل ہے امن کاانتخاب کریں، مزید جنگوں کا نہیں۔ دہائیوں میں دیکھے گئے بدترین دوہرے معیار کو ختم کرنے کے لیے ووٹ دیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں