ایرانی سپریم لیڈر آیت اللہ خامنہ ای کا کہنا ہے کہ اسرائیل پر حماس کے حملے میں ایران ملوث  نہیں ہے۔

تفصیلات کے مطابق ایرانی سپریم لیڈر آیت اللہ خامنہ ای نے اپنے بیان میں کہا کہ  اسرائیل پر حملہ  کرنے میں ملوث نہیں لیکن حملہ کرنے والوں کے ہاتھ چومتے ہیں۔

آیت اللہ خامنہ ای نے کہا کہ اسرائیل پر یہ حملہ اس کی فوج اور انٹیلی جنس کے لیے ناقابل تلافی شکست ہے۔

ان کا مزید کہنا تھا کہ حماس کے تباہ کن حملے نے اسرائیل کے اہم انفرا اسٹرکچر کو تباہ کردیا ہے جس کی تلافی اتنی آسان نہیں ہے۔

ایران کے سپریم لیڈر نے اسرائیل کو ہی اس کی اپنی تباہی کا ذمہ دار قرار دیا ہے۔

واضح رہے کہ حماس کے مسلسل حملوں میں اسرائیل کے اندر 100 فوجیوں سمیت ا یک ہزار سے زائد اسرائیلی  بھی ہلاک ہو گئے ہیں جبکہ ڈھائی ہزار سے زائد زخمی ہیں۔

حماس نے جنگ میں اب تک اسرائیلی فوجیوں سمیت بڑی تعداد میں اسرائیلیوں کو حراست میں لیا ہے۔

حماس کی فوج کے ترجمان کا کہنا ہے کہ  القسام بریگیڈ کےمطابق سیکڑوں اسرائیلی فوجی حراست میں ہیں  تاہم  ابھی تعداد نہیں بتاسکتے کتنے اسرائیلی حراست میں ہیں ۔

دوسری جانب اسرائیل نے غزہ کی  مکمل ناکہ بندی کرتے ہوئے کھانے پینے کی اشیا، ایندھن سمیت اہم ضروریات کی چیزوں کی فراہمی کا راستہ روک دیا ہے اور پانی کی سپلائی بھی منقطع کردی جبکہ فضائی کارروائیوں میں سیکڑوں فلسطینی جاں بحق ہوگئے۔

فلسطین کی وزارت صحت نے بتایا کہ غزہ میں پیر کو جاں بحق افراد کی تعداد بڑھ کر 560 ہوگئی ہے۔

صہیونی فوج نے مریضوں کو لے جانے والی ایمبولینسوں پر بھی میزائل مار نا شروع کردیے  اور شہری علاقوں میں گھروں پر بمباری کی جس سے رہائشی عمارتیں ملبے کا ڈھیربن گئیں اور غزہ کے اسپتال زخمیوں سے بھر گئے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں