ترک وزیر خارجہ حقان فیدان نے قطری  وزیر خارجہ شیخ محمد بن عبدالرحمان الثانی  سے  ملاقات میں غزہ کی صورتحال پر گفتگو کی۔

بین الاقوامی خبررساں ادارے کے مطابق  دوحہ میں ترک وزیرخارجہ حقان فیدان کی قطری وزیر خارجہ شیخ محمد بن عبدالرحمان الثانی سے ملاقات ہوئی۔

قطری وزیر خارجہ نے کہا کہ  قطر غزہ پر اجتماعی سزا کی پالیسی کی مذمت کرتا ہے۔3 ملین سے  زیادہ فلسطینیوں کو ان کی بنیادی ضروریات سے محروم کر دیا گیا ہے۔

شیخ محمد بن عبدالرحمان الثانی  کا کہنا تھا کہ  یرغمالیوں کے  لیے مذاکرات جاری ہیں۔ غزہ میں پرامن حل تک پہنچنے کا واحد راستہ مواصلاتی ذرائع کو آزاد کرنا ہے۔

انہوں نے  اسرائیل  کی غزہ پر بمباری بین الاقوامی قوانین کی خلاف ورزی  قرار دیتے ہوئے کہا کہ   قطر محصور علاقے میں بحران کو کم کرنے کے لیے ترکی اور علاقائی شراکت داروں کے ساتھ تعاون جاری رکھے گا۔

اس موقع پر    ترک وزیر خارجہ کا کہنا تھا کہ   اسرائیل اور حماس کے تنازعے کو حتمی طور پر حل کرنا ہی اس بحران سے واپسی کا واحد راستہ ہے۔ آج ہم اس موڑ پر ہیں  کہ یا تو ہم دیرپا امن تک پہنچ جائیں گے یا پھر عالمی جنگ چھڑ جائے گی۔

حقان فیدان نے کہا کہ  وہ ممالک جو اسرائیل کو اپنے جرائم جاری رکھنے کی ترغیب دے رہے ہیں وہ  اس تباہی کے ذمہ دار ہیں۔ اسرائیل کو یہ سمجھنا چاہیے کہ اسے تشدد کے ساتھ امن اور سلامتی حاصل نہیں ہو سکتی۔

انہوں نے مزید کہا کہ اسرائیل حماس جنگ کا واحد حل یہ ہے کہ 1967 کی سرحدوں کی بنیاد پر آزاد فلسطینی ریاست قائم کی جائے جس کا دارالحکومت مشرقی یروشلم ہو۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں