غزہ میں اسپتال پر اسرائیلی حملے  کے خلاف اقوام متحدہ سمیت  عالمی رہنماؤں کی  جانب سے شدید مذمت کی گئی ہے۔

بین الاقوامی خبر رساں ادارے کے  مطابق  ترک صدر رجب طیب اردگان  نے غزہ میں معصوم شہریوں کو نشانہ  بنانے کی شدید الفاظ میں مذمت کی۔

ترک صدر نے کہا کہ   خواتین، بچوں اور معصوم شہریوں سے بھرے ہوئے اسپتال کو نشانہ بنانا بنیادی انسانی اقدار سے مبرا اسرائیل کے حملوں کی تازہ ترین مثال ہے۔

انہوں نے کہا کہ میں تمام انسانیت کو دعوت دیتا ہوں کہ وہ غزہ میں جاری اس بے مثال ظلم کو روکنے کے لیے اقدام اٹھائیں۔

کینیڈین وزیر اعظم جسٹن ٹروڈو  نے غزہ میں اسپتال پر حملے کی شدید مذمت کرتے ہوئے کہا کہ  اسپتال میں جو کچھ ہوا وہ خوفناک، ناقابل قبول ہے اور اسپتالوں پر حملے غیر قانونی ہیں۔

اقوام متحدہ کے سیکریٹری جنرل انتونیو گوتریس  نے غزہ میں اسپتال پر بمباری کی شدید مذمت کرتے ہوئے کہا کہ   زخمی اور جاں بحق ہونے والوں کے گھر والوں کے غم میں برابر شریک ہوں۔

انتونیو گوتریس کا کہنا تھا کہ   عالمی قوانین کے مطابق اسپتال اور طبی عملے کو نشانہ بنانا سنگین جرم ہے۔

ایران کی وزارت خارجہ نے اسرائیلی فضائی حملے کی شدید مذمت کی ہے ۔

ایرانی وزارت خارجہ  کی جانب سے جاری بیان میں کہا گیا ہے کہ اس میں سیکڑوں غیر مسلح اور معصوم لوگ شہید اور زخمی ہوئے ہیں۔

صدر یورپی کونسل چارلس مشل نے کہا کہ  اسپتال پر حملہ اور شہری انفراسٹرکچر کو نشانہ بنانا بین الاقوامی قانون کی خلاف ورزی ہے۔

روس اور متحدہ عرب امارات نے غزہ میں اسپتال کو نشانہ بنانے پر اقوام متحدہ کی سلامتی کونسل کا ہنگامی اجلاس طلب کر لیا ہے۔

اس سے قبل امریکا اور اس کے اتحادیوں نے روس کی جنگ بندی کی قرار داد کو سلامتی کونسل میں ویٹو کر دیا تھا۔

واضح رہے کہ  غزہ کے ایک اسپتال پر اسرائیلی فوج کی بمباری میں 500 سے زائد فلسطینی شہید اور سیکڑوں زخمی ہوگئے ہیں۔

بین الاقوامی خبر رساں ادارے کے مطابق  فلسطینی وزارت صحت  نے بتایا کہ اسرائیلی طیاروں نے اسپتال کو  نشانہ بنایا جس میں طبی عملہ، مریض اور  پناہ لیے ہوئے عام شہری شہید ہوئے۔

دوسری جانب فلسطینی میڈیا کا کہنا ہے کہ  غزہ اسپتال پر حملے میں شہادتوں کی تعداد  ایک ہزار سے تجاوز کر گئی ہے۔

ترجمان شہری دفاع اسے کھلا  قتل عام  قرار دیتے ہوئے کہا کہ  ہر طرف جسموں کے ٹکڑے ، بچوں اور خواتین کی سربریدہ لاشیں ہیں۔ اس حملے بعد ایسی صورتحال سے نمٹنے کے قابل نہیں ہیں۔

فلسطینی صدر محمود عباس نے اسپتال پر فضائی حملے کے بعد تین روزہ سوگ کا اعلان کیا ہے۔