اسرائیلی فضائی حملے میں ایک اور فلسطینی صحافی و فوٹو جرنلسٹ شہید ہوگیا۔

غیر ملکی خبر رساں ادارے کی رپورٹ کے مطابق اسرائیلی فضائی حملوں میں فوٹو جرنلسٹ محمد معین عیاش اپنے خاندان کے متعدد افراد سمیت شہید ہوگئے۔

رپورٹ کے مطابق اسرائیلی جیٹ طیاروں نے نصیرات پناہ گزین کیمپ میں ان کے گھر پر بمباری کی۔

یاد رہے کہ اسرائیل اور حماس کے درمیان جاری جنگ کے دوران اب تک 53 فلسطینی صحافی اور میڈیا ورکرز شہید ہوچکے ہیں۔

دوسری جانب جبالیہ کے ایک حصے پر اسرائیلی فضائی حملے میں 33 افراد شہید اور درجنوں زخمی ہوگئے جب کہ خان یونس شہر میں ایک اپارٹمنٹ پر اسرائیلی فضائی حملے میں 10 افراد شہید اور 22 زخمی ہوگئے ہیں۔

ادھر اسرائیلی فوج نے زخمی افراد کو لے جانے والی ایمبولینس کو بھی نہیں بخشا جب کہ ایمبولینس میں زخمی بچے اور طبی عملے کے لوگ موجود تھے۔

خیال رہے کہ اسرائیل نے غزہ میں جنگ بندی پر عمل درآمد کل تک موخر کردی ہے جس کے بعد جنگ میں وقفہ اور یرغمالیوں کی رہائی کا عمل کل سے شروع ہوگا۔

7 اکتوبر سے جاری اسرائیلی جارحیت کے نتیجے میں 15 ہزار سے زائد فلسطینی شہید اور 33 ہزار سے زائد زخمی ہوچکے ہیں۔