نئی دہلی: بھارتی ٹریڈ یونینوں نے مودی حکومت سے اسرائیل کے ساتھ لیبر ڈیل ختم کرنے کا مطالبہ کردیا ہے۔

کشمیر میڈٰیا سروس کی رپورٹ کے مطابق اسرائیل نے غزہ پر وحشیانہ جارحیت کے بعد فلسطینی مزدوروں کے ورک پرمنٹ منسوخ کردیے ہیں۔

رپورٹ کے مطابق بھارت اور اسرائیل کے درمیان لیبر ڈیل طے ہوئی ہے جس کے نتیجے میں ہزاروں بھارتی مزدوروں کو فلسطینی تعمیراتی کارکنوں کی جگہ اسرائل میں کام پر رکھا جائے گا جب کہ بھارت کی بڑی ٹریڈ یونینوں نے اس ڈیل کی مخالفت کردی ہے۔

ٹریڈ یونینوں نے مودی حکومت سے مطالبہ کیا ہے کہ وہ اسرائیل کے ساتھ معاہدے کو ختم کرے اور فلسطینی مزدوروں کو تبدیل کرنے سے انکار کرکے ان کے ساتھ یکجہتی کا اظہار کریں۔

رپورٹ میں کہا گیا ہے کہ سینٹر آف انڈین ٹریڈ یونینز (سی آئی ٹی یو)، آل انڈیا ٹریڈ یونین کانگریس (اے آئی ٹی سی یو)، انڈین نیشنل ٹریڈ یونین کانگریس (آئی این ٹی سی یو)، ہند مزدور سبھا (ایچ ایم ایس) سمیت کئی دیگر بھارتی ٹریڈ تنظیمیں شامل ہیں۔

ٹریڈ یونین تنظیمو نے ایک کھلے خط میں کہا ہے کہ بھارت کے لیے اس سے زیادہ غیر اخلاقی اور تباہ کن کوئی چیز نہیں ہوسکتی کہ وہ اپنے مزدور اسرائیل بھیجے۔

واضح رہے کہ غزہ پر اسرائیلی جارحیت میں اب تک بارہ ہزار سے زائد بے گناہ فلسطینی شہید ہوچکے ہیں جن میں زیادہ تعداد بچوں اور خواتین کی ہے۔