سعودی وزیر دفاع کا کہنا ہے کہ  غزہ   کے لیے انسانی امداد کی بلا روک ٹوک اجازت وقت کی ضرورت ہے ۔

بین الاقوامی خبررساں ادارے کے مطابق  سعودی وزیر دفاع خالد بن سلمان اور برطانوی وزیر دفاع گرانٹ شیپس کے درمیان ٹیلیفونک رابطہ ہوا جس میں  دونوں رہنماؤں  نے غزہ کی صورتحال پر تبادلہ خیال کیا۔

سعودی وزیر دفاع نے غزہ میں فوجی کارروائی کو ختم کرنے اور شہریوں کے تحفظ کو یقینی بنانے پر زور  دیتے ہوئے کہا کہ غزہ کے لیے انسانی امداد  کی بلا روک ٹوک اجازت وقت کی ضرورت ہے۔

دونوں رہنماؤں نے سعودی اور برطانوی سٹریٹجک دفاعی تعاون کا جائزہ لیا اور اسے مزید مضبوط بنانے کے طریقے پر بھی غور کیا۔

واضح رہے کہ اسرائیل اور حماس کے درمیان دو روز قبل 4 روز کے لیے جنگ بندی پر اتفاق ہوا تھا جس کا اطلاق پاکستانی وقت کے مطابق آج صبح 10 بجے سے ہوگیا ہے۔

اسرائیل اور حماس کے درمیان 4 روزہ عارضی جنگ بندی معاہدے کے تحت اسرائیلی جیلوں میں قید 150 فلسطینیوں کو رہا کیا جائے گا جبکہ حماس کی جانب سے 50 صہیونی یرغمالیوں  کو رہا  کیا جائے گا۔

حماس کے مطابق جنگ بندی کے دوران اسرائیلی طیاروں کی جنوبی غزہ میں پروازوں پر مکمل پابندی ہوگی جبکہ غزہ سٹی اور شمالی غزہ پر روزانہ چھ گھنٹے صبح 10 بجے سے شام 4 بجے تک اسرائیلی طیارے پرواز نہیں کریں گے۔

غزہ میں 7 اکتوبر سے جاری اسرائیلی بربریت میں 6 ہزار سے زائد بچوں اور 2 ہزار خواتین سمیت 14 ہزار سے زائد فلسطینی شہید ہوچکے ہیں  جبکہ 33 ہزار سے زائد زخمی ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں