شمالی تنزانیہ میں شدید بارشوں، سیلاب اور لینڈ سلائیڈنگ  سے 47 افراد ہلاک اور 85 زخمی ہوگئے۔

غیر ملکی خبر رساں ادارے کی رپورٹ کے مطابق تنزانیہ میں شدید بارشوں کے باعث دارالحکومت ڈوڈوما سے تقریباً 300 کلومیٹر شمال میں واقع شہر کاٹیش شدید متاثر ہوا ہے۔

شدید بارشوں اور سیلاب کی وجہ سے علاقے کی کئی سڑکیں کیچڑ، پتھروں اور اکھڑے ہوئے درختوں کی وجہ سے بند ہوگئی ہیں جب کہ بارشوں کا سلسلہ آئندہ چند دنوں تک جاری رہنے کا امکان ہے۔

رپورٹ کے مطابق شدید بارشوں، سیلاب اور لینڈ سلائیڈنگ  سے 47 افراد ہلاک اور 85 زخمی ہوگئے ہیں جب کہ ہلاکتوں میں اضافے کا خدشہ ظاہر کیا جارہا ہے۔

تنزانیہ کی وزارت صحت کی جانب سے جاری کردہ ویڈیو پیغام میں کہا گیا ہے ’’ہم اس واقعے سے بہت حیرزدہ ہوگئے ہیں‘‘۔

خیال رہے کہ مشرقی افریقہ غیر معمولی خشک سالی کا سامنا کرنے کے بعد کئی ہفتوں سے طوفانی بارشوں اور سیلاب کی زد میں ہے جس کا تعلق ایل نینو موسمی رجحان سے ہے۔

ایل نینو ایک قدرتی طور پر بننے والا موسمی پیٹرن ہے جو بحر الکاہل میں شروع ہوتا ہے اور دنیا بھر میں گرمی کو بڑھاتا ہے اور اس سسٹم سے کچھ علاقوں میں خشک سالی جب کہ کہیں شدید بارشیں بھی ہوتی ہیں۔