بھارت میں کورونا وائرس کے 752 نئے کیسز رپورٹ ہوئے ہیں جب کہ 4 افراد اپنی جان کی بازی ہار بیٹھے ہیں۔

بھارتی میڈیا کے مطابق گذشتہ 24 گھنٹوں کے دوران بھارت میں کورونا وائرس سے 4 افراد ہلاک ہوئے جب کہ بھارت بھر میں 24 گھنٹوں میں 752 نئے کیسز رپورٹ ہوئے۔

بھارتی میڈیا کا کہنا ہے کہ کورونا وائرس سے ہلاک ہونے والوں میں 2 کا تعلق ریاست کیرالہ، ایک کا راجستھان جب کہ ایک کا کرناٹکا سے ہے۔

کورونا وائرس کے حوالے سے بھارتی وزارت صحت کی جانب سے بھی اعداد و شمار جاری کیے گئے ہیں جس کے مطابق بروز ہفتہ کو سب سے زیادہ کیسز رپورٹ ہوئے۔

رپورٹ کے مطابق بھارت میں کورونا وائرس سے اب تک 5 لاکھ 33 ہزار 332 اموات ہوچکی ہیں جب کہ ملک بھر میں کیسز کی تعداد 4 کروڑ 50 لاکھ سے تجاوز کرچکی ہے۔

بھارت کی مرکزی وزارت صحت کی ویب سائٹ کے مطابق کورونا وائرس سے صحتیاب ہونے والوں کی تعداد بڑھ کر 4 کروڑ 44 لاکھ 71 ہزار 212 ہوگئی جب کہ صحتیاب ہونے والوں کی شرح 98.81 فیصد ہے۔

وزارت صحت کی ویب سائٹ میں بتایا گیا ہے کہ ملک بھر میں اب تک کووڈ ویکسین کی 220 کروڑ سے زائد خوراکیں لگائی جاچکی ہیں۔

خیال رہے کہ بھارت میں کورونا وائرس کی نئی قسم سامنے آئی ہے جس کے باعث خدشات نے جنم لے لیا ہے اور لوگ خوف میں مبتلا ہیں۔

عالمی ادارہ صحت (ڈبلیو ایچ او) کی سابق چیف سائنسدان ڈاکٹر سومیا سوامی ناتھن کہتی ہیں فی الحال گھبرانے کی ضرورت نہیں ہے کیونکہ اس نئی قسم سے تشویش کی کوئی بات نہیں۔

تاہم ڈاکٹر سومیا سوامی ناتھن نے لوگوں پر زور دیا کہ وہ مناسب احتیاطی تدابیر اختیار کرتے ہوئے محتاط رہیں۔