غزہ میں اسرائیلی جارحیت کو 74 روز مکمل ہوگئے ہیں جب کہ ہر جانب تباہی اور مایوسی کے مناظر ہی دیکھنے کو مل رہے ہیں۔

غیر ملکی خبر رساں ادارے کے مطابق اسرائیل کی جبالیہ کیمپ پر وحشیانہ بمباری سے 90 فلسطینی شہید ہوگئے ہیں جب کہ رفح میں زوردار دھماکے میں رہائشی مکانات کو نشانہ بنایا گیا ہے۔

رپورٹ کے مطابق رفح میں ہونے والے دھماکے میں 2 افراد شہید اورہ متعدد افراد زخمی ہوگئے ہیں۔

دوسری جانب اسرائیلی طیاروں نے خان یونس کے مشرق میں بنی سہیلہ سمیت جنوب مشرقی علاقے میں بھی دو حملے کیے، مقبوضہ مغربی کنارے میں حملے سے 5 فلسطینی شہید ہوئے۔

اسرائیلی فورسز نے غزہ کے کمال عدوان اسپتال میں تباہی مچانے کے بعد کا محاصرہ ختم کردیا تاہم عالمی ادارہ صحت کے سربراہ نے شمالی غزہ میں کمال عدوان اسپتال کی تباہی کی مذمت کرتے ہوئے کہا کہ کمال عدوان اسپتال کے غیرفعال ہونے سے 8 افراد جاں بحق ہوئے ہیں۔

یاد رہے کہ حماس اور اسرائیل کے درمیان جھڑپیں جاری ہیں اور غزہ میں اسرائیلی جارحیت کے جواب میں حماس کی بھرپور جوابی کارروائیاں بھی جاری ہیں۔

حماس نے مزید دو اسرائیلی فوجیوں کی ہلاکتوں کا اعتراف کیا ہے جب کہ حماس نے اسرائیلی مرکاوا ٹینک کو نشانہ بنانے کی بھی ویڈیو جاری کی ہے۔

واضح رہے کہ غزہ میں 7 اکتوبر سے جاری اسرائیلی جارحیت کے نتیجے میں اب تک 18 ہزار سے زائد فلسطینی شہید ہوگئے ہیں جن میں بڑی تعداد بچوں اور خواتین کی شامل ہے۔