ماسکو: روس کے دارالحکومت ماسکو میں شدید برفباری کے بعد پروازوں کی آمدورفت متاثر ہوگئی ہے۔

غیر ملکی خبر رساں ادارے کی رپورٹ کے مطابق روس میں برفباری نے پچھلے 145 سالوں کا ریکارڈ توڑ دیا جب کہ گذشتہ کئی روز سے بارش اور برفباری جاری ہے۔

رپورٹ کے مطابق سائبیریا کے کچھ حصوں میں درجہ حرارت منفی 56 ڈگری سینٹی گریڈ ریکارڈ کیا گیا ہے۔

رپورٹ میں کہا گیا ہے کہ ماسکو کے چار میں سے تین ایئرپورٹس پر 53 پروازیں تاخیر کا شکار ہیں جب کہ پانچ پروازیں منسوخ کردی گئیں ہیں۔

ڈپٹی میئر پیوتر بیریوکوف کا کہنا ہے کہ اتوار کو شروع ہونے والی برفباری رات بھر جاری رہی جس کے باعث پہلے سے موجود برف کی سطح میں 23 سینٹی میٹر کا اضافہ ہوا۔

انہوں نے کہا کہ 1 لاکھ 35 ہزار افراد اور 18 ہزار آلات برف کو صاف کرنے کی کوشش کررہے ہیں۔

ماسکو کے محکمہ ٹرانسپورٹ کی رپورٹ کے مطابق گذشتہ 24 گھنٹوں کے دوران 200 ٹرک برف میں پھنس گئے جب کہ سڑکوں پر ٹریفک کے رضاکاروں کی اشد ضرورت ہے۔

خبر رساں ادارے کے مطابق ماسکو کے شمال میں واقع ایئرپورٹس زیادہ متاثر ہوئے ہیں جب کہ جنوب کے دو ایئرپورٹس میں بھی تاخیر کا سامنا ہے۔

رپورٹ میں مزید کہا گیا ہے کہ شہر کے جنوب مشرق میں زوکوفسکی ایئرپورٹ پر پروازیں شیڈول کے مطابق ماسکو سے روانہ ہو رہی ہیں۔