عالمی ادارہ صحت (ڈبلیو ایچ او) نے خبردار کیا ہے کہ شمالی غزہ کے تمام اسپتال غیر فعال ہوگئے ہیں۔

بین الاقوامی خبررساں ادارے کے مطابق عالمی ادارہ صحت (ڈبلیو ایچ او) کا کہنا ہے کہ ایندھن، عملے اور سامان کی کمی کی وجہ سے شمالی غزہ  کے تمام اسپتال غیر فعال ہوگئے ہیں۔

عالمی ادارہ صحت کے نمائندے رچرڈ پیپرکورن نے کہا کہ غزہ میں الاحلی اسپتال فعال تھا جو اب ایندھن اور سامان کی کمی کی وجہ سے مکمل غیر فعال ہوگیا ہے۔

واضح رہے کہ اسرائیل کی غزہ میں بمباری سے شہید ہونے والے افراد کی تعداد 20 ہزار سے تجاوز کرگئی ہے۔

جنگ کی شروعات سے اب تک فلسطینی شہداء کی تعداد 20 ہزار ہوگئی ہے جس میں 8 ہزار بچے اور 6 ہزار سے زائد خواتین شامل ہیں۔

اسرائیل نے غزہ میں ایک دن میں 56 مکانات کو تباہ کیا اور  خان یونس کا بڑا حصہ خالی کرنے کا حکم دے دیا۔

اقوام متحدہ کے شیلٹر میں  ایک لاکھ 40 ہزار بے گھر فلسطینی موجود ہیں۔

اسرائیلی فوجی مسلسل رہائشی عمارتوں، اسکولوں، مساجد  اور اسپتالوں  پر حملے کررہے ہیں۔

اقوام متحدہ  کا ذیلی ادارہ یونیسیف  غزہ کو بچوں کا قبرستان  قرار دے  چکا ہے۔

یونیسیف کے ترجمان جیمز ایلڈر نے جنیوا میں اقوام متحدہ کی پریس بریفنگ میں کہا  تھا کہ  غزہ میں ہر 10 منٹ میں ایک بچہ شہید ہو رہا ہے۔

یونیسیف کی ایگزیکٹو ڈائریکٹر کیتھرین رسل نے اقوام متحدہ کی سلامتی کونسل سے خطاب کرتے ہوئے کہا   تھا کہ غزہ میں ہر روز 420 سے زائد بچے اسرائیلی بمباری سے شہید یا زخمی ہو رہے ہیں۔