جنوبی کوریا کی اپوزیشن جماعت ڈیموکریٹک پارٹی کے رہنما لی جے میونگ ایک پریس کانفرنس کے دوران چاقو حملے میں زخمی ہوگئے۔

غیر ملکی خبر رساں ادارے کے مطابق جنوبی کوریا کی اپوزیشن جماعت ڈیموکریٹک پارٹی کے رہنما لی جے میونگ ساحلی شہربوسان کے دورے پر تھے کہ ایک شخص نے ان کی گردن میں چاقو گھونپ دیا۔

رپورٹ کے مطابق اپوزیشن لیڈر کو بے ہوشی کی حالت میں  فوری طور پر اسپتال منتقل کیا گیا جہاں ان کی حالت خطرے سے باہر بتائی جارہی ہے۔

پولیس کے مطابق حملہ آور آٹوگراف لینے کے بہانے اپوزیشن رہنما کے قریب آیا اور حملہ کردیا جب کہ واقعہ کی مزید تحقیقات جاری ہیں۔

پولیس کا کہنا ہے کہ حملہ آور کی عمر 60 سال کے قریب ہے جس نے تقریباً 18 سینٹی میٹر کے چاقو کا استعمال کیا جس کا بلیڈ 13 سینٹی میٹر کا تھا جب کہ حملہ آور نے چاقو کو آن لائن خریدا تھا۔

خبر رساں ادارے نے بتایا کہ حملہ آور کو جائے وقوعہ سے گرفتار کرلیا گیا ہے۔

عینی شاہد کہتے ہیں ’’جب لی جے میونگ اپنی گاڑی کی جانب جارہے تھے تو حملہ آور نے آٹوگراف مانگا‘‘۔

ڈیموکریٹک پارٹی کے رکن پارلیمان کوون چل سیونگ نے بوسان میں اسپتال کے باہر میڈیا سے گفتگو کرتے ہوئے کہا ’’یہ دہشت گردی کی کارروائی ہے جو جمہوریت کے لیے خطرہ ہے اور یہ کسی بھی صورت قابل قبول نہیں‘‘۔