سال 2023 میں کشمیری حریت پسندوں کے حملوں میں بھارتی فوج کے متعدد افسر اور جوان مارے گئے۔

پچھلے ایک سال میں بھارتی فوج نے معصوم کشمیریوں پر بے انتہا ظلم کیا جب کہ دسمبر میں تین شہریوں کے قتل عام پر 3 اسٹار آفیسر لیفٹیننٹ جنرل سندیپ جین کو عہدے سے بر طرف کردیا گیا۔

لیفٹیننٹ جنرل نوین سچدیوا نے لیفٹیننٹ جنرل سندیپ جین سے وائٹ نائٹ کور جنرل آفیسر کمانڈنگ کا چارج سنبھال لیا ہے۔

بھارتی میڈیا نے افسر کی برطرفی کی وجہ ان کی ناقص کارگردگی بتائی جب کہ لیفٹیننٹ جنرل سندیپ جین کو اپنے جوانوں کی موت اور معصوم کشمیریوں کی ہلاکت کا ذمہ دار ٹھہریا گیا ہے۔

21 دسمبر2023 کو راجوڑی میں ہونے والے حملے میں 4 بھارتی فوجی ہلاک ہوئے تھے اور بھارتی فوج نے 4 فوجیوں کی ہلاکت کی ذمہ داری 3 نہتے شہریوں پر ڈال دی تھی۔

بھارتی فوج نے معصوم کشمیریوں پر بہیمانہ تشدد کر کے ان کو شہید کر دیا تھا لیکن ان کی ویڈیو سوشل میڈیا پر وائرل ہوگئی تھی۔

ویڈیو میں بھارتی فوج کے مظالم کو دیکھا جاسکتا تھا جب کہ بھارتی فوج کے لیڈروں میں مہارت اور فیصلہ سازی کا فقدان دکھائی دیتا ہے۔

بھارتی فوج کی اعلیٰ قیادت کی مسلسل ناکامی ان کی افواج کے لیے شرمندگی کا باعث بن گئی ہے بھارتی فوج کی اعلٰی قیادت کی پیشہ ورانہ نااہلی کشمیر میں بھارتی فوج کے لیے نہایت نقصان دہ ثابت ہورہی ہے۔

واضح رہے کہ بھارتی فوج اپنی نا اہلی کے باعث تحریک آزادی کشمیر کو دبانے میں بری طرح ناکام ہوگئی ہے۔