سی آئی اے نے ایران کے شہر کرمان میں خودکش دھماکوں کا ذمہ دار داعش افغانستان کو قرار دیا ہے۔

غیر ملکی خبر رساں ادارے کے مطابق افغانستان ہمسایہ ممالک میں دہشت گردی کا ذریعہ بن رہا ہے  جب کہ پاکستان کو کالعدم تحریک طالبان پاکستان سے خطرات کا سامنا ہے اور اب ایران داعش کے ساتھ نمٹ رہا ہے۔

بین الاقوامی جریدے کے مطابق سی آئے اے نے تصدیق کی ہے کہ ایران کے شہر کرمان میں خودکش دھماکوں کی ذمہ دار داعش افغانستان ہے۔

دوسری جانب افغان طالبان المرصاد نے ایکس اکاوٴنٹ کے ذریعے الزام تراشی کرتے ہوئے تین الگ الگ بیانیے جاری کیے ہیں۔

افغان طالبان المرصاد نے بتایا کہ دہشت گرد تاجکستان سے آئے جب کہ یہ ایک بین الاقوامی سازش تھی۔

المرصد یہ کہہ کر الزام تبدیل کرنے کی کوشش کرتے رہے کہ خودکش حملہ آور تاجک شہری تھے جب کہ پڑوسی ممالک داعش کو ایران کے خلاف استعمال کر رہے ہیں۔

طالبان کا میڈیا ونگ کرمان حملوں کو ایران کے خلاف ایک بین الاقوامی سازش کے طور پر بھی پیش کرتا رہا اور اسے اسرائیل کے قبضے کے خلاف ایران کی فلسطین نواز خارجہ پالیسی کے موقف سے جوڑتا رہا۔

المرصد نے ایران پر بھی الزام لگاتے ہوئے دعویٰ کیا کہ افغان حکومت نے داعش کی سرگرمیوں کے بارے میں انٹیلیجنس شیئر کی، طالبان ذرائع کا انٹیلیجنس شیئر کرنے کا مطلب یہ تھا کہ اگر ایران معلومات پر عمل کرتا تو دہشت گردحملوں کو روکا جا سکتا تھا۔

یاد رہے کہ افغانستان علاقائی استحکام کو متاثر کرنے والی دہشت گردانہ سرگرمیوں کا مرکز بن گیا ہے۔

میڈیا رپورٹ کے مطابق امریکہ نے ایران میں دوہرے بم دھماکوں میں داعش کے کردار کی تصدیق کی ہے جب کہ کرمان بم دھماکوں کے نتیجے میں جانوں کا بڑا نقصان ہوا ہے اور تقریباً 100 افراد جاں بحق ہوئے ہیں۔

خیال رہے کہ افغانستان سے پھیلنے والی دہشت گردی پورے خطے کے لیے ایک بڑا خطرہ ہے جب کہ افغانستان کے ہمسایہ ممالک اس دہشت گردی کے اثرات کا مسلسل شکار ہو رہے ہیں۔

افغانستان میں دہشت گرد گروہوں کی موجودگی پورے خطے کو غیر مستحکم کرنے اور غیر یقینی اور عدم تحفظ کا ماحول پیدا کررہی ہے۔

طالبان حکومت خطے میں ہونے والی دہشت گردی اور اس میں افغان سرزمین کے استعمال ہونے سے مسلسل انکار کررہی ہے۔