گیانا کے صدر کو ماحولیاتی آلودگی پر لیکچر دینا بی بی سی کے اینکر پرسن کو مہنگا پڑگیا۔

گیانا کے صدر محمد عرفان علی نے برطانوی نشریاتی ادارے ( بی بی سی) کے پروگرام ہارڈ ٹاک میں اینکر پرسن کو ماحولیاتی آلودگی کے حوالے سے ناکوں چنے چبوا دیئے۔

بی بی سی اینکر نے ان سے سوال کیا کہ گیانا کے سمندر سے 150 بلین ڈالر مالیت کےتیل اور گیس کے ذخائر نکالے گئے جس کی وجہ سے 2 بلین ٹن کاربن سے دنیا کا ماحول آلودہ ہوا۔

اس سوال پر صدر محمد عرفان علی نے انہیں درمیان میں ٹوکا اور کہا کہ یہاں بیٹھ کر لیکچر نہ دیں، کیا آپ جانتے ہیں کہ گیانا کا جنگل انگلینڈ اور اسکاٹ لینڈ دونوں کے کل رقبے کے برابر ہے، یہ جنگل 19 ٹن سے زائد کاربن جذب کرتا ہے، اور اس جنگل کو ہم نے زندہ رکھا ہوا ہے، کیا اس پر آپ کو یہ حق حاصل ہے کہ آپ ماحولیاتی تبدیلی پر ہمیں لیکچر دیں؟

انہوں نے کہاکہ یہاں میں آپ کو ماحولیاتی تبدیلی پر لیکچر دونگا، کیونکہ ہم نے اس جنگل کو زندہ رکھا ہے ، جو 19 ٹن کاربن جذب کرتا ہے، اور جس پر کام رکوا کر تم فائدہ اٹھاتے ہو، دنیا فائدہ اٹھاتی ہے اور تم اس کی قیمت ادا نہیں کرتے، جس کی تمھارے نزدیک کوئی قدر نہیں۔

گیانا کے صدر نے مزید کہاکہ دنیا میں سب سے کم جنگل کشی گیانا میں ہوتی ہے، پتہ ہے کیوں؟ ہمارے تیل کی تلاش کی بڑی دریافت اور گیس کے ذخائر کے باوجود ہماری ماحولیاتی آلودگی پھیلانے کی شرح صفر ہے، گیانا اپنی پوری ایکسپلوریشن کے باجود صفر کاربن پیدا کرتا ہے۔

گیانا کے صدر محمد عرفان علی کا اپنے معدنی وسائل اور ماحولیاتی آلودگی سے متعلق لیکچر پوری دنیا کو گیا ہے اور سوشل میڈیا پر وائرل اس کلپ کو پوری دنیا میں سراہا جارہا ہے۔