ریاض: سعودی عرب اور خلیجی ممالک میں آج عیدالاضحیٰ مذہبی عقیدت و احترام سے منائی جارہی ہے۔

 عیدالاضحیٰ کے موقع پر سعودی عرب کی 12 ہزار سے زائد مساجد میں نماز عید کے اجتماعات ہوئے اور لاکھوں کی تعداد میں فرزند اسلام نے مسجد نبوی ﷺ میں عیدالاضحیٰ کی نماز ادا کی۔

پاکستانیوں سمیت لاکھوں حجاج کرام نے عیدالاضحیٰ کی نماز میں شرکت کی اور حرم شریف میں عید کی تکبیرات، فضا میں اللہ اکبر کی آواز گونج اٹھی۔

مسجد الحرام میں نمازعید کی امامت شیخ عبدالرحمان السدیس نے کی اور امام کعبہ کی فلسطین، مسجد اقصیٰ کی آزادی کے لیے دعائیں کی۔

خطبہ کے بعد حجاج کرام اللہ کی راہ میں جانور قربان کریں گے، جس کے ساتھ ہی عازمین کا فریضہ حج مکمل ہوجائے گا اور حجاج کرام احرام کھول دیں گے۔

عید کا خطبہ دنیا بھر میں ایک ارب سے زائد افراد نے سماعت کیا، اس حوالے سے سعودی پریس ایجنسی نے بتایا کہ خطبے کا 20 زبانوں میں ترجمہ کیا گیا۔

خطبہ عید میں کہا گیا کہ امت مسلمہ فلسطینیوں کو یہود کے ظلم سے نجات دلائے۔

حجاج کرام آج بڑے شیطان کی رمی کریں گے جبکہ حجاج آج قربانی کے بعد سر منڈوائیں گے، احرام کھول دیں گے جس کے بعد حجاج طواف، زیارت کے لیے مسجدالحرام جائیں گے اور سعی کریں گے۔

واضح رہے کہ پاکستان سمیت بھارت اور عمان میں عید الضحیٰ کل منائی جائی گی، امریکا، کینیڈا میں اس بار بھی دو عیدیں منائی جائیں گی، مسلم کمیونٹی کے بعض افراد آج اور بعض افراد کل عید منائیں گے۔