واشنگٹن: امریکی وزیر خارجہ انتونی بلنکن کا کہنا ہے کہ اسرائیلی وزیر اعظم نیتن یاہو نے امریکی تجویز پر غزہ میں جنگ بندی پر اتفاق کرلیا ہے۔

غیر ملکی خبر رساں ادارے کے مطابق امریکی وزیر خارجہ انتونی بلنکن کی اسرائیلی وزیر اعظم نیتن یاہو سے ملاقات ہوئی جس کے بعد ایک بیان جاری کیا گیا ہے جب کہ ملاقات کو مثبت قرار دیا جارہا ہے۔

رپورٹ کے مطابق بیان میں کہا گیا ہے کہ اسرائیلی وزیر اعظم نے امریکی تجویز ہر عمل در آمد پر یقین دہانی کروائی ہے جب کہ پلان میں حماس کے زیر حراست افراد کو رہا کیا جانا بھی شامل ہے۔

امریکی وزیر خارجہ کا کہنا ہے کہ جنگ بندی میں مزید تاخیر کا مطلب مزید مغویوں کا مرنا ہے جب کہ اس سے معاہدے میں مزید رکاوٹیں بھی پیدا ہوسکتی ہیں۔

رپورٹ میں بتایا گیا ہے کہ امریکی وزیر خارجہ اب اگلے مرحلے میں جنگ بندی معاہدے میں پیش رفت اور اسے یقینی بنانے کے لئے مصر اور دوحہ جائیں گے۔

رپورٹ میں مزید بتایا گیا ہے کہ اسرائیلی وزیر اعظم نے بھی اس ہفتے قائرہ میں جاری مصری، قطری اور امریکی ثالثی میں ہونے والے مذاکرات میں اپنی ٹیم بھیجنے کی منصوبہ بندی کی ہے۔

امریکہ کو یہ امید ہے کہ حماس اور اسرائیل کے درمیان معاہدہ طے پاجائے گا تاہم اس طرح کی کوئی امید ابھی تک اسرائیل یا حماس کی جانب سے سامنے نہیں آئی ہے۔