اسرائیلی فوج نے دعویٰ کیا ہے کہ بیروت حملے میں لبنان کی مزاحمتی تنظیم حزب اللہ کے سربراہ حسن نصر اللہ کو شہید کردیا گیا ہے۔

غیر ملکی خبر رساں ادارے کی رپورٹ کے مطابق اسرائیل نے گذشتہ روز بیروت میں حزب اللہ کے ہیڈکوارٹر پر حملہ کیا جب کہ حملے کے باعث متعدد دھماکوں کی آوازیں بھی سنی گئیں۔

اسرائیل کی ڈیفنس فورس کی جانب سے اب یہ دعویٰ سامنے آیا ہے کہ بیروت حملے میں حسن نصر اللہ جاں بحق ہوچکے ہیں لیکن اسرائیل کی جانب سے بھی کوئی ثبوت فراہم نہیں کیے گئے ہیں۔

اسرائیلی فوج نے یہ بھی دعویٰ کیا ہے کہ حزب اللہ کے سینئر رہنما علی کرکی اور شام و لبنان میں القدس فورس کے کمانڈر عباس نیلفوروشن بھی اس حملے میں جاں بحق ہوچکے ہیں جب کہ حسن نصر اللہ کی صاحبزادی زینب نصراللہ کو بھی شہید کرنے کا دعویٰ سامنے آٰیا ہے۔

خیال رہے کہ اسرائیل کی بیروت پر بمباری کے نتیجے میں 6 رہائشی عمارتیں مکمل طور پر تباہ ہوگئیں جب کہ اسرائیل نے اس حملے میں جدید بنکر بسٹر بموں کا استعمال کیا ہے، یہ مہلک بم 2 ہزار 2 سو کلو تک وزنی ہوتے ہیں۔

اسرائیلی فوج نے بتایا کہ حسن نصراللہ بیروت میں 6 عمارتوں کے نیچے بنکر میں موجود تھے، حسن نصراللہ کو نشانہ بنانے کی منصوبہ بندی طویل عرصے سے کی گئی تھی۔

دوسری جانب حزب اللہ نے تاحال اسرائیلی فوج کے دعوؤں پر کوئی تبصرہ نہیں کیا ہے جب کہ حسن نصراللہ سے قریبی ذرائع کا گزشتہ روز سے رابطہ نہیں ہوا ہے۔

واضح رہے کہ مقامی حکام کے مطابق لبنان میں پیر سے اب تک اسرائیلی حملوں میں تقریباً 700 افراد جاں بحق ہوچکے ہیں۔