لبنان کے وزیر خارجہ عبداللہ بو حبیب کا کہنا ہے کہ اقوام متحدہ میں بائیڈن کی تقریرامید افزاء نہ تھی، اس سے مسئلہ حل نہیں ہوگا۔

غیر ملکی خبر رساں ادارے کی رپورٹ کے مطابق لبنان کے وزیر خارجہ عبداللہ بو حبیب نے اسرائیل لبنان جنگ سے متعلق امریکی صدر کے بیان پر اظہار مایوسی کرتے ہوئے کہا کہ بائیڈن کی اقوام متحدہ میں تقریر امید افزاء نہیں تھی۔

انہوں نے کہا کہ بیان سے مایوسی کے باوجود بھی پر امید ہوں کہ امریکہ واحد ملک ہے جو مشرق وسطیٰ میں صورت حال بدل سکتا ہے۔

لبنانی وزیر خارجہ کا کہنا ہے کہ ہماری نجات کت لئے امریکہ کا کردار اہم ہے، لبنان خود سے لڑائی ختم نہیں کرسکتا، ماضی کی مایوسیوں کے باوجود امریکہ کی مدد درکار ہے۔

عبداللہ بو حبیب کا مزید کہنا تھا کہ لبنان میں جنگ سے اسرائیلیوں کی گھروں کو واپسی میں مدد نہیں ملے گی، اس کا حل صرف مذاکرات میں ہی ہے۔

خیال رہے کہ اسرائیل کے لبنان پر وحشیانہ حملے جاری ہیں جس کے نتیجے میں لبنان میں اب تک ہلاکتوں کی تعداد 569 سے متجاوز کرگئی ہے اور 18 سو سے زائد افراد زخمی ہیں۔

بیروت پر تازہ حملے میں حزب اللہ کے اہم کمانڈر ابراہیم قبیسی شہید ہوگئے ہیں جب کہ لبنان پر لائیو ٹی وی شو میں شریک ایک صحافی بھی میزائل حملے کا نشانہ بن کر زخمی ہوگئے۔

اسرائیلی حملوں سے بچنے کے لئے سیکڑوں لبنانی شہری شام میں داخل ہوگئے ہیں، اسرائیلی حملوں کے پیش نظر لبنان میں تعلیمی ادارے ایک ہفتے کیلئے بند کردیے گئے ہیں۔

دوسری جانب لبنانی مزاحمتی تنظیم حزب اللہ نے بھی جوابی کارروائی کرتے ہوئے اسرائیل پر 3 سو سے زیادہ راکٹ داغے ہیں، حزب اللہ کی جانب سے کئی فوجی اہداف کو نشانہ بنانے کا دعویٰ بھی کیا گیا ہے۔