نیویارک: اسرائیلی وزیر اعظم نیتن یاہو کے ہوٹل کے سامنے فلسطین کی حمایت میں مظاہرین کی بڑی تعداد میں شرکت۔

غیر ملکی خبر رساں ادارے کی رپورٹ کے مطابق فلسطین کی حمایت میں ہزاروں مظاہرین نیویارک کی سڑکوں پر نکل آئے ہیں۔

رپورٹ میں بتایا گیا ہے کہ نیویارک میں موجود اسرائیلی وزیر اعظم نیتن یاہو کے ہوٹل کے سامنے ہزاروں مظاہرین نے اپنا احتجاج ریکارڈ کروایا۔

رپورٹ میں مزید بتایا گیا ہے مطاہرے رات گئے تک جاری رہے جس میں مظاہرین ان کے ہوٹل کے باہر جمع ہوئے اور غزہ میں جاری اسرائیلی جارحیت کے خلاف نعرے لگائے۔

خیال رہے کہ اسرائیلی وزیر اعظم نیتن یاہو اقوام متحدہ کی جنرل اسمبلی کے 79 ویں اجلاس میں شرکت کے لیے نیویارک میں موجود ہیں۔ اسرائیلی وزیر اعظم آج اقوام متحدہ کی جنرل اسمبلی سے خطاب کریں گے۔

گذشتہ روز فلسطینی صدر محمود عباس نے اقوام متحدہ کی جنرل اسمبلی کے 79 ویں اجلاس سے خطاب کرتے ہوئے کہا تھا کہ نہتے فلسطینی اسرائیل کی جارحیت کا شکار ہیں۔

فلسطینی صدر کا کہنا تھا کہ اسرائیلی بربریت پرعالمی عدالت انصاف نے تاریخی فیصلہ دیا، جنرل اسمبلی نے فلسطین کو ریاست کا درجہ دینے کی قرارداد منظور کی۔

انہوں نے کہا تھا کہ اسرائیل کی جانب سےعالمی قوانین کی دھجیاں اڑائی جارہی ہیں جب کہ فلسطینیوں کی نسل کشی کی جارہی ہے،  فلسطینی عوام کے ساتھ یکجہتی کرنے والوں کا شکریہ ادا کرتے ہیں۔

محمود عباس نے اپیل کرتے ہوئے کہا تھا کہ قابض اسرائیلی فوج اسپتالوں کوبھی نشانہ بنارہی ہے، غزہ میں ہنگامی بنیادوں پر امداد کی فراہمی یقینی بنائی جائے۔

ان کا کہنا تھا کہ اسرائیل کو غزہ کا ایک سینٹی میٹر علاقہ بھی لینے نہیں دیں گے، فلسطین ہمارا وطن ہے اور ہم اسے چھوڑ کر نہیں جائیں گے۔

فلسطینی صدر نے مزید کہا تھا کہ فلسطینی عوام غزہ سے نہیں نکلیں گے، یہ ہمارے باپ دادا کی زمین ہے، فلسطین ہمارا ہے اور ہمارا ہی رہے گا لیکن غاصب اسرائیل غزہ سے ایک دن ضرور نکلے گا۔