نیویارک: اقوام متحدہ کی جنرل اسمبلی کے 79 ویں سالانہ اجلاس میں خطاب کرتے ہوئے انتونیو گوتریس نے کہا کہ موسمیاتی تبدیلی کی وجہ سے دنیا کی آبادی کو تباہی کا سامنا ہے جب کہ دنیا کو کیسے بچانا ہے یہ اب ہمارے ہاتھ میں ہے۔

اقوام متحدہ کے سیکرٹری جنرل انتونیو گوتریس نے جنرل اسمبلی کے 79 ویں سالانہ اجلاس میں خطاب کرتے ہوئے کہا کہ غزہ کو مسلسل خوفناک صورت حال کا سامنا ہے جب کہ ہمیں ایسے چیلنجز درپیش ہیں جس کا پہلے کبھی سامنا نہیں ہوا۔

انتونیو گوتریس نے کہا کہ موجودہ صورت حال میں عالمی اداروں کا اثر کم ہوتا جارہا ہے جب کہ موسمیاتی تبدیلی کی وجہ سے دنیا کی آبادی کو تباہی کا سامنا ہے، موسمیاتی تبدیلی کی وجہ سے درجہ حرارت بڑھتا جارہا ہے۔

ان کا کہنا تھا کہ دنیا کو متبادل توانائی منصوبوں کی جانب جانا ہوگا، دنیا کو کیسے بچانا ہے یہ اب ہمارے ہاتھ میں ہے اور موسمیاتی تبدیلی کے اثرات سے نمٹنے کے لئے سب کو کردار ادا کرنا پڑے گا۔ جی 20 ممالک کو کہا ہےکہ توانائی منصوبوں میں سرمایہ کاری کریں، اے آئی ٹیکنالوجی کی وجہ سے بھی دنیا میں بڑی تبدیلیاں آرہی ہیں۔

اقوام متحدہ کے سیکرٹری جنرل کا کہنا ہے کہ اے آئی ٹیکنالوجی کے اثرات پر نظر رکھنے کے لئے اقدامات کی ضرورت ہے، اقوام متحدہ  ڈائیلاگ کے لئےعالمی پلیٹ فارم ہے، اے آئی ٹیکنالوجی کی دنیا میں بہتری کے استعمال کے لئے کردار ادا کرنا ہوگا۔

انتونیو گوتریس مزید کہتے ہیں کہ ہمیں دنیا کے محفوظ مستقبل کے لئے اختلافات بھلا کراکٹھا ہونا ہوگا، آئیں ساتھ دیں تاکہ مل کر دنیا میں انصاف قائم کریں جب کہ دنیا ہماری طرف دیکھ رہی ہے اور انصاف کے لئے مل کر کام کرنا ہوگا۔

دوسری جانب صدراقوام متحدہ جنرل اسمبلی فیلیمون یانگ نے افتتاحی سیشن سے خطاب میں کہا کہ مسئلہ فلسطین  کے حل کے لیے سب کو مل کر کردار ادا کرنا ہوگا، دنیا میں قیام امن کے لیے مشترکہ اقدامات کرنا ہوں گے جب کہ سب کو مل کر لوگوں کی زندگیوں کوآسان بنانا ہوگا۔