ایرانی میڈیا اور حزب اللہ ذرائع  نے دعویٰ کیا ہے کہ اسرائیلی حملے میں  حسن نصراللہ بلکل محفوظ  رہے ہیں۔

ایرانی خبر ایجنسی تسنیم نیوز کے مطابق حزب اللہ کے سکریٹری جنرل سید حسن نصراللہ  اور ایگزیکٹو کونسل کے سربراہ سید ہاشم صفی الدین اسرائیلی حملے کے بعد محفوظ ہیں، انہیں حملوں سے کوئی نقصان نہیں پہنچا۔

ایرانی میڈیا کے لبنان میں نمائندے نے ذرائع کی بنیاد پر دعویٰ کیا کہ جمعے کی شام کیے گئے اسرائیلی حملے میں حزب اللہ کی قیادت کا کوئی بھی شخص شہید نہیں ہوا اور اسرائیل اپنے مزموم مقاصد میں ناکام رہا۔

حزب اللہ کے ایک سینئر کمانڈر نے  بھی بین الاقوامی خبررساں ادارے رائٹرز کو تصدیق کی  ہے کہ حسن نصر اللہ حملے میں محفوظ رہے ہیں۔

اس سے قبل یہ اطلاعات سامنے آئی تھیں کہ بیروت کے جنوبی علاقے داہیہ میں اسرائیلی طیاروں نے سید حسن نصراللہ اور صفی الدین کو نشانہ بنایا ہے۔

اسرائیلی فوج کے ریڈیو کے مطابق ایف 35 طیاروں نے بنکر بسٹر بموں کا استعمال کرتے ہوئے رہائشی عمارتوں کو نشانہ بنایا اور دعویٰ کیا کہ ان عمارتوں کے تہہ خانوں میں حزب اللہ کا دفتر موجود تھا۔

لبنانی وزارت صحت کا کہنا ہے کہ  بیروت پراسرائیلی حملے  میں6افرادشہید اور 91زخمی ہوئے ہیں۔

بین الاقوامی میڈیا رپورٹ کے مطابق لبنان پرتازہ حملےمیں حزب اللہ کےسربراہ حسن نصراللہ کی بیٹی زینب شہید ہوگئی ہیں تاہم  حزب اللہ کی جانب سے زینب نصراللہ کی شہادت کی تصدیق نہیں کی گئی۔