بیروت: اسرائیلی فورسز نے جنوبی لبنان میں رہائشیوں کو گھر خالی کرنے کی دھکمی دے دی ہے۔

غیر ملکی خبر رساں ادارے کی رپورٹ کے مطابق اسرائیلی فورسز کی جانب سے جنوبی لبنان کے 25 گاؤں کے رہائشیوں کو فوری گھر خالی کرنے کی وارننگ جاری کردی گئی ہے۔

اسرائیلی دفاعی فورسز کی جانب سے سماجی رابطے کی سائٹ ایکس پر جاری بیان میں کہا گیا ہے ’’ہم آپ کو نقصان پہچانا نہیں چاہتے لہذا اپنی حفاظت کے لیے فوری طور پر گھر خالی کردیں‘‘۔

اسرائیلی دفاعی فورسز نے کہا ’’جو گھر بھی حزب اللہ کی ملٹری ضروریات کو پوری کرنے کے لیے استعمال ہوگا، اس کو نشانہ بنایا جائے گا‘‘۔

اسرائیلی فورسز نے دھکمی دیتے ہوئے یہ بھی کہا ’’فوری طور پر اوالی دریا کے شمال کی طرف چلے جائیں، محتاط رہیں آپ کو جنوب کی طرف جانے کی اجازت نہیں‘‘۔

اسرائیلی فورسز کا مزید کہنا تھا ’’جنوب کی طرف جانے سے آپ کی زندگیوں کو خطرات لاحق ہوسکتے ہیں، جب آپ کے لیے گھر واپس آنا محفوظ ہوگا تو ہم آپ کو اطلاع کردیں گے‘‘۔

خیال رہے کہ اسرائیلی نے لبنان میں فضائی حملوں کے بعد اب زمینی جنگ بھی مسلط کردی ہے، اسرائیل نے لبنان کے سرحدی علاقوں کو سیل کرتے ہوئے بستیوں کو چھاؤنی قراردے دیا ہے۔

اسرائیلی افواج  کا کہنا ہے کہ زمینی آپریشن کا مقصد حزب اللہ  کی چیک پوسٹوں کو نشانہ بنانا ہے جب کہ  لبنانی فوج نے جنوبی سرحد پر کئی مقامات کو خالی کردیا ہے۔