لندن: محکمہ موسمیات کی جانب سے برطانیہ میں طافان برٹ کے خطرے کی وجہ سے  دو امبر وارننگز جاری کردی گئیں۔

غیر ملکی خبر رساں ادارے کی رپورٹ کے مطابق میٹ آفس کا کہنا ہے کہ برطانیہ کا  بیشتر حصہ یلو وارننگ سے متاثر ہے جب کہ آئرلینڈ میں ریڈ وارننگ بھی جاری کی گئیں ہیں۔

میٹ آفس کے مطابق برفباری، بارش، تیز ہواؤں اور طوفان برٹ کے برطانیہ سے ٹکرانے سے ممکنہ طور پر سیلاب آنے کا خدشہ ہے جب کہ 16 سیلاب کے الرٹ جاری کیے گئے ہیں-

انگلینڈ اور اسکاٹ لینڈ کے لیے سیلاب کی وارننگ ہے جب کہ زیادہ تر برطانیہ ہوا، بارش یا برف کی وجہ سے یلو وارنننگ سے متاثر ہوسکتا ہے۔

آئرلینڈ کے دو علاقوں میں صبح 10 بجے تک شدید بارش کے لیے ریڈ وارننگ جاری کی گئیں ہیں۔ لندن، برمنگھم، مانچسٹر، لیورپول، ہل اور مڈلینڈز کے علاقے کے لیے وارننگ جاری نہیں کی گئیں ہیں۔

میٹ آفس کے ماہر موسمیات ایڈن میک گیورن نے کہا کہ ہفتے کی صبح شمالی انگلینڈ اور اسکاٹ لینڈ کے کچھ حصوں میں دو سے چار گھنٹے کی شدید برف باری ہوگی۔

انہوں نے بتایا کہ نچلی سطح پر پانچ سے 10 سینٹی میٹر جب کہ پہاڑیوں پر 20 سے 40 سینٹی میٹر تک تیز ہواؤں کے ساتھ برف باری ہوسکتی ہے۔

پہاڑیوں پر سفر کرنے ، ناگوار حالات اور بجلی کی لائنوں پر برف جمنے کی وجہ سے بجلی میں خلل پڑنے کا خطرہ بھی موجود ہے۔

میٹ آفس نے مزید کہا کہ طوفان بحر اوقیانوس سے ہلکی ہوا لے کر آئے گا جس کی وجہ سے درجہ حرارت تیزی سے بڑھے گا۔