امریکی انتخابات 2024 میں ٹرمپ کی حمایت میں مسلمان ووٹرز کی تعداد 6 سے بڑھ کر 30 فیصد ہوگئی۔

امریکہ میں انتخابی دنگل سج گیا ہے جس میں ڈیموکریٹک امیدوار کملا ہیرس اور ری پبلکن امیدوار ڈونلڈ ٹرمپ کے درمیان کانٹے کا مقابلہ متوقع ہے۔

وقت گزرنے کے ساتھ ساتھ کئی ریاستوں میں پولنگ کا عمل مکمل ہوگیا ہے جب کہ کئی ریاستوں سے نتائج بھی سامنے آنا شروع ہوگئے ہیں۔

اب تک کے نتائج کے مطابق ڈونلڈ ٹرمپ نے 19 ریاستوں میں میدان مارلیا ہے جب کہ کملا ہیرس 12 ریاستوں میں کامیاب ہوئیں ہیں۔

امریکی میڈیا کے مطابق موجودہ انتخابات میں ڈونلڈ ٹرمپ کے مسلمان ووٹرز کی تعداد میں اضافہ ریکارڈ کیا گیا ہے۔

سال 2020 میں ڈونلڈ ٹرمپ نے مسلمانوں کے 6 فیصد ووٹ حاصل کیے تھے تاہم موجودہ انتخابات میں یہ تعداد بڑھ کر 30 فیصد تک پہنچ گئی ہے۔

دوسری جانب ڈونلڈ ٹرمپ کے پروٹسٹنٹ ووٹرز کی تعداد 64 فیصد سے کم ہوکر 59 فیصد، ایل ڈی ایس (مورمون) ووٹرز کی 66 فیصد سے کم ہوکر 60 فیصد، یہودی ووٹرز کی 32 فیصد سے کم ہوکر 31 فیصد جب کہ کیتھولک ووٹرز کی تعداد 52 فیصد ہی رہی ہے۔

واضح رہے کہ کملا ہیرس کو 39 فیصد پروٹسٹنٹ، 45 فیصد کیتھولک، 33 فیصد ایل ڈی ایس (مورمون)، 67 فیصد یہودی اور 61 فیصد مسلمان ووٹرز نے موجودہ انتخابات میں ووٹ دیا ہے۔