شامی صدر بشارالاسد کی اہلخانہ کے ہمراہ ملک چھوڑ کر روس میں سیاسی پناہ لینے کی اطلاعات سامنے آرہی ہیں۔

بین الاقوامی خبررساں ادارے نے کریملن میں ذرائع کے حوالے سے خبر دی ہے کہ معزول شامی صدر بشارالاسد اور ان کے اہلخانہ ماسکو پہنچ چکے ہیں جہاں روس نے انہیں انسانی ہمدردی کی بنیادوں پر سیاسی پناہ دے دی ہے۔

اس حوالے سے مزید کوئی تفصیلات سامنے نہیں آسکیں کہ بشارالاسد اہلخانہ کے ہمراہ اکیلے روس پہنچے ہیں یا ان کے بعض قریبی ساتھی بھی ساتھ گئے ہیں۔

قبل  ازیں بشار الاسد کی طیارہ حادثے میں ہلاکت کی متضاد خبریں سامنے آرہی تھیں۔  عالمی میڈیا پر متضاد رپورٹس میں کہا جارہا تھا کہ بشارالاسد کے طیارے کا رابطہ ریڈار سے منقطع ہوگیا ہے اور خدشہ ہے کہ کوئی حادثہ پیش آیا ہے اور وہ ہلاک ہوچکے ہیں۔

ذرائع نے خبر رساں اداروں کو بتایا کہ شامی اپوزیشن رہنماؤں نے شام میں روسی فوجی اڈوں اور سفارتی اداروں کی حفاظت کی ضمانت دینے پر اتفاق کیا ہے تاہم  ذرائع نے یہ نہیں بتایا کہ سیکیورٹی کی ضمانت کب تک جاری رہے گی۔

دوسری جانب کچھ روسی بلاگرز نے کہا  ہے کہ فوجی اڈوں کے ارد گرد کی صورتحال انتہائی کشیدہ ہے۔

واضح رہے کہ  باغی مسلح گروپوں کے دمشق پر قابض ہونے  اور صدر بشار الاسد کے ملک چھوڑ جانے کے بعد   شامی وزیر اعظم محمد غازی الجلالی نے اعلان کیا ہے کہ وہ دمشق میں اپنی جگہ نہیں چھوڑیں گے۔

محمد غازی الجلالی نے کہا سب لوگوں کو مل کر ملک کی بحالی کے لیے سوچنا ہوگا، ملک کی بہتری کے لیے ہم اپوزیشن کی طرف ہاتھ بڑھاتے ہیں، امید ہے حکومت مخالف فورسز کسی شہری کو نقصان نہیں پہنچائیں گی۔