نو منتخب صدر ڈونلڈ ٹرمپ امریکی کیپیٹل واشنگٹن ڈی سی میں 20 جنوری کو منعقد ہونے والی حلف برداری کی 60ویں افتتاحی تقریب میں دو بائیبل پر ہاتھ رکھ کر آج شام اپنے عہدے کا حلف اٹھائیں گے۔

ٹرمپ کی تقریب حلف برداری میں جاپان، بھارت، آسٹریلیا کے وزرا خارجہ شرکت کریں گے، چین کے نائب صدر اپنے ملک کی نمائندگی کریں گے جبکہ پاکستان کی نمائندگی امریکا میں پاکستان کے سفیر رضوان سعید شیخ کریں گے۔

اس کے علاوہ بلاول بھٹو سمیت پاکستان کی کئی سیاسی شخصیات اور پاکستانی امریکن بھی تقریب میں شریک ہوں گے۔

 اس موقع پر ڈونلڈ ٹرمپ اپنی بائیبل استعمال کریں گے جو انہیں 1955 میں نیویارک میں سنڈے چرچ پرائمری اسکول کی گریجویشن کے موقع پر ان کی والدہ نے دی تھی۔

بائیبل کا یہ ایڈیشن تھامسن اینڈ سند نے شائع کیا تھا جس کے نچلے حصہ پر ڈونلڈ ٹرمپ کا نام اور دینے کی تاریخ بھی کنندہ ہے۔

حلف برداری میں استعمال ہونے والی دوسری بائیبل Lincoln ہے جو کہ پہلی بار 1861 میں 16ویں امریکی صدر کی حلف برداری کے وقت استعمال ہوئی تھی۔

‏Lincoln بائیبل اس سے قبل تین بار حلف کیلئے استعمال ہوئی تھی، پہلی دو بار سابق صدر بارک ابامہ نے اس بائیبل پر حلف لیا تھا جبکہ تیسری بار ڈونلڈ ٹرمپ نے اس بائیبل پر اپنے پہلے دور صدارت میں حلف کیا تھا۔

واضح رہے کہ 6 نومبر 2024 کو صدارتی انتخابات میں ڈونلڈ ٹرمپ دوبارہ امریکہ کے صدر منتخب ہوگئے تھے۔

ٹرمپ نے مشرقی انڈیانا، کینٹکی اور ویسٹ ورجینیا سمیت 27 ریاستوں میں کامیابی حاصل کی جبکہ کمالا ہیرس نے 19 ریاستوں میں کامیابی حاصل کی تھی۔

امریکی صدارتی انتخابات میں کل 538 الیکٹورل ووٹوں میں سے ریپبلکن امیدوار ڈونلڈ ٹرمپ نے 277 ووٹ حاصل کیے جبکہ ڈیموکریٹک امیدوار کمالا ہیرس کو 226 الیکٹورل ووٹ ملے، تاہم صدر بننے کے لیے کسی بھی امیدوار کو کم از کم 270 الیکٹورل ووٹ درکار تھے۔