بھارتی ایئرلائن ایئر انڈیا نے پاکستانی فضائی حدود بند ہونے پر نقصان کی تلافی کے لیے بھارتی حکومت کو خط لکھ دیا۔

خبر ایجنسی کے مطابق خط میں کہا گیا ہے کہ پاکستانی فضائی حدود کی پابندی ایک سال رہی تو ایئرلائن کو 60 کروڑ ڈالر نقصان ہوگا۔

ایئر انڈیا نے حکومت سے مطالبہ کیا ہے کہ پاکستانی فضائی حدود کی بندش سے ہونے والے نقصان کی تلافی کی جائے، جبکہ ایئر انڈیا نے بھارتی حکومت سے اقتصادی نقصان کے تناسب سے سبسڈی ماڈل کے لیے کہا ہے۔

 پاکستانی فضائی حدود کی بندش سے ایئرانڈیا سمیت دیگر بھارتی ایئرلائنز کو طویل سفر کے باعث زیادہ اخراجات اٹھانا پڑ رہے ہیں اور مسافروں کو بھی تاخیر کے باعث مشکلات کا سامنا ہے۔

ایوی ایشن ذرائع کے مطابق پاکستانی فضائی حدود کی بندش سے ائیر انڈیا کو روزانہ 20کروڑ بھارتی روپے سے زائد کا نقصان ہوتا ہے، شمالی امریکہ، یورپ، برطانیہ اور مشرق وسطیٰ کے لیے بھارتی طیارے طویل راستے اختیار کرنے پر مجبور ہوتے ہیں۔

ذرائع کے مطابق پاکستان کی فضائی حدود کی بندش کی وجہ سے بھارتی ایئرلائنز کی پروازوں کے دورانیے میں 2 سے 4 گھنٹے کا اضافہ ہوگیا ہے، طویل روٹ کی وجہ سے مسافر متاثر ہوتے ہیں، پروازوں میں تاخیر ہوتی ہے اور اخراجات میں اضافہ ہوتا ہے۔

اخراجات میں اضافے کے علاوہ بھارتی اییرلائنز کے عملے کو ڈیوٹی ٹائم میں اضافے اور آرام میں کمی کی مشکلات بھی کا سامنا ہے۔