پاک فضائیہ کے ہاتھوں بھارتی فضائیہ کے زیر استعمال رافیل طیارے گرائے جانے کے بعد جدید ترین لڑاکا طیارے بنانے والی فرانسیسی کمپنی کے شیئرز گر گئے۔

بین الاقوامی خبر ایجنسیوں کے مطابق حالیہ جھڑپوں میں پاک فضائیہ کے ہاتھوں بھارتی فضائیہ کے رافیل طیاروں کی تباہی کے بعد فرانسیسی دفاعی کمپنی ڈسالٹ سسٹمز کے شیئرز میں نمایاں کمی ریکارڈ کی گئی ہے۔

ڈیسالٹ ایوی ایشن کے شیئرز کی قدر میں 1.64 فیصد کمی واقع ہوئی ہے حالانکہ گزشتہ پانچ روز کے دوران ان میں 3.4 فیصد اضافہ دیکھنے میں آیا تھا۔

رافیل طیارے جدید ترین ٹیکنالوجی سے لیس جنگی طیارے سمجھے جاتے ہیں جو بھارتی فضائیہ کے زیرِ استعمال ہیں، تاہم گزشتہ ماہ بھارت نے فرانس کے ساتھ مزید 26 رافیل ایم جنگی طیارے خریدنے کا معاہدہ کیا تھا۔

اس واقعے کے بعد بھارت کی دفاعی پالیسی پر بھی سوالات اٹھنے لگے ہیں جبکہ سوشل میڈیا اور بعض عسکری تجزیہ نگاروں نے اس ناکامی پر شدید تنقید کی ہے۔

واضح رہے کہ گزشتہ روز بھارت نے بزدلانہ کارروائی کرتے ہوئے رات کے اندھیرے میں پاکستان کے 6 مقامات بہالپور، کوٹلی، مظفر آباد سمیت دیگر علاقوں میں فضا سے میزائل داغے جس کے بعد پاکستان نے جوابی کارروائی 3 رافیل سمیت 5 بھارتی طیاروں کو تباہ کیا، تاہم صبح ہوتے ہی بھارت نے ایل او سی پر سفید جھنڈا لہرا کر اپنی شکست تسلیم کرلی۔