نئی دہلی: بھارت میں اپوزیشن رہنماؤں نے وزیراعظم نریندر مودی کی عسکری اور سفارتی حکمت عملیوں کو شدید تنقید کا نشانہ بناتے ہوئے ان پر شفافیت کی کمی، جھوٹے بیانیے گھڑنے اور قومی سلامتی کے معاملات میں نااہلی کے الزامات عائد کیے ہیں۔

تلنگانہ کے وزیراعلیٰ ریونت ریڈی نے مودی سرکار کو آڑے ہاتھوں لیتے ہوئے کہا ہے کہ حالیہ پاک بھارت کشیدگی کے دوران بھارتی فضائیہ کو بھاری نقصان اٹھانا پڑا، جسے مودی حکومت چھپانے کی کوشش کر رہی ہے۔

ریونت ریڈی نے ایک جلسے سے خطاب میں کہا کہ مودی سے سیدھا سوال ہے، پاکستان نے حالیہ جنگ میں بھارت کے کتنے رافیل طیارے مار گرائے؟ اگر کچھ نہیں چھپانا تو سچائی عوام کے سامنے کیوں نہیں لائی جا رہی؟۔

انہوں نے الزام عائد کیا کہ مودی سرکار جھوٹے بیانیوں کا سہارا لے کر عوام کو گمراہ کرنے کی پرانی روش پر قائم ہے اور اس بار بھی پاک بھارت جھڑپ میں بھارت کی ناکامی کو مختلف پروپیگنڈوں کے ذریعے چھپانے کی کوشش کی جا رہی ہے۔

ریونت ریڈی نے مزید کہا کہ مودی حکومت نے چار دن کی محدود فوجی کارروائی کے بعد اچانک آپریشن روک دیا، عوام کو یہ نہیں بتایا گیا کہ اصل میں کیا ہوا۔ جنگ بندی سے قبل دیگر سیاسی جماعتوں کی مشاورت کیوں نہیں کی گئی؟۔

انہوں نے الزام لگایا کہ مودی مؤثر جنگی حکمت عملی اپنانے میں ناکام رہے اور امریکی صدر ڈونلڈ ٹرمپ کے دباؤ میں آ کر جنگ بندی پر مجبور ہوئے۔

سیاسی مبصرین کا کہنا ہے کہ ریونت ریڈی کی تنقید نہ صرف موجودہ حکومت کی عسکری پالیسیوں پر سوالیہ نشان ہے بلکہ یہ مودی کی عوامی حمایت کو بھی متاثر کرسکتی ہے، خاص طور پر ایسے وقت میں جب بھارت کی داخلی اور خارجی پالیسیوں پر تنقید میں اضافہ دیکھنے میں آ رہا ہے۔