پہلگام فالس فلیگ آپریشن میں بھارت کا مقبوضہ کشمیر کے رہائشیوں کو بےدخل کرنے کا منصوبہ بےنقاب ہوگیا ہے۔

ذرائع کے مطابق بھارت مقبوضہ جموں کشمیر کے رہائشیوں کو زبردستی پاکستان بےدخل کرنے لگا، کشمیری پولیس اہلکار کی ویڈیو نے بھارتی منصوبہ بےنقاب کردیا، مقبوضہ کشمیر کی پولیس میں خدمات انجام دینے والے کشمیری پولیس اہلکار کا احتجاج جاری ہے۔

کشمیری پولیس اہلکار کا کہنا ہے کہ میں گزشتہ 27 سال سے جموں و کشمیر پولیس میں خدمات انجام دے رہا ہوں، ہائیکورٹ کے واضح احکامات ہیں کہ ہمیں جموں وکشمیر سے باہر نہیں بھیجا جائےگا۔

اہلکار نے بتایا کہ پولیس کے اعلیٰ حکام بھارتی ہائیکورٹ کا فیصلہ تسلیم نہیں کررہے، ہمیں زبردستی جموں وکشمیر سے بے دخل کیا جا رہا ہے۔

کشمیری پولیس اہلکار نے مزید کہا کہ میں آئی جی صاحب سے گزارش کرتا ہوں کہ ہماری بےدخلی کی کارروائی نہ کی جائے، میں نے ہرفورم پر اپنا مطالبہ پیش کیا مگر کوئی بھی شنوائی نہ ہوسکی، بھارتی پاسپورٹ ہونے کے باوجود یہاں سے بےدخلی پر کیوں مجبور کیا جارہا ہے۔

کشمیری پولیس اہلکار کی اہلیہ کے بیان کے مطابق ہمارا پاکستان میں کوئی رشتہ دار نہیں ہے، ہمیں کیوں بے دخل کیا جا رہا ہے؟ ہم یہاں27 سال سے رہائش پذیر ہیں۔

اس حوالے سے دفاعی ماہرین نے کہا کہ مودی سرکار سوچے سمجھے منصبوبے کے تحت کشمیریوں کو بربریت کا نشانہ بنارہی ہے، انسانی حقوق کی تنظیموں کو مقبوضہ کشمیر میں جاری سنگین انسانی جرائم کا نوٹس لینا چاہیے۔