ٹیسلا اور اسپیس ایکس کے بانی ایلون مسک نے حکومت سے نکلنےکے بعد امریکی صدر ڈونلڈ ٹرمپ پرسنگین الزام کردیا۔

سوشل میڈیا پلیٹ فارم X (سابقہ ٹوئٹر) پر ارب پتی صنعتکار ایلون مسک نے اپنے پیغام  میں کہا کہ اب بڑےانکشاف کاوقت آگیاہے۔

ایلون مسک نے امریکی صدر پر الزام عائد کرتے ہوئے کہا کہ اصل ڈونلڈٹرمپ ایپسٹین کی فائلوں میں موجودہے، ٹرمپ انتظامیہ اس لیےجیفری ایپسٹین فائلزپبلک نہیں کررہی، یاد رکھیں، سچ ایک دن ضرور سامنے آئےگا۔

یہ بھی پڑھیں: ایلون مسک کی صدر ٹرمپ کے کٹوتی بل پر شدید تنقید

یاد رہے کہ یہ فائلز مشہور کاروباری شخصیت جیفری ایپسٹین سے متعلق سرکاری دستاویزات ہیں۔ ایپسٹین پر الزام تھا کہ وہ امیر اور بااثر افراد کیلئے کم عمر لڑکیوں کا انتظام کرتا تھا۔ ان فائلوں میں ان تمام لوگوں کے نام شامل ہو سکتے ہیں جو اس کے ساتھ رابطے میں تھے یا اس کے کام میں شامل تھے۔

ایلون مسک نے صدرٹرمپ پر تنقید کرتے ہوئے کہا کہ میرے بغیر صدرڈونلڈٹرمپ الیکشن ہارجاتے، میرے بغیر ڈیموکریٹس کوایوان میں کنٹرول مل جاتا۔

دوسری جانب امریکی صدر ڈونلڈ ٹرمپ نے کہا کہ ایلون مسک کی تنقیدسےبہت مایوسی ہوئی ہے، ایلون مسک بل کےمعاملات سےبخوبی واقف تھے۔

تاہم ایلون مسک ایکس پر ٹرمپ کے بیان کے حوالے کہا کہ مجھےبگ بیوٹی بل کبھی نہیں دکھایاگیا، بل عجلت میں منظورکیاگیاکہ ارکان بھی نہ پڑھ سکے۔

ٹرمپ اور الیکٹرک کار کمپنی کے سی ای او ایلون مسک کے درمیان اختلافات بڑھنے پر جمعرات کو ٹیسلا کے حصص 15 فیصد سے زیادہ گر گئے ، جس سے مارکیٹ کیپٹلائزیشن میں 100 ارب ڈالر سے زیادہ کا نقصان ہوا۔