حیفا: اسرائیل کے شہر حیفا میں ایران کے حالیہ میزائل حملوں کے دوران زیر زمین اسپتال میں خاتون نے تین بچوں کو جنم دے دیا۔

غیر ملکی خبر رساں ادارے کی رپورٹ کے مطابق ایرانی حملوں سے اسرائیل میں خوف و ہراس کی فضا قائم ہے اور حملوں سے بچنے کے لیے بزدل اسرائیلی زیر زمین بنکرز میں رہنے پر مجبور ہیں۔

رپورٹ کے مطابق زیر زمین رَمبام اسپتال میں پیر کے روز ایک اسرائیلی خاتون نے تین بچوں کو جنم دیا ہے۔

یہ بھی پڑھیں: ایران کے میزائل حملوں سے خوفزدہ اسرائیلی شہری ملک سے فرار ہونا شروع

اسپتال حکام کے مطابق ایران کی جانب سے حیفا پر میزائل حملوں کے بعد سیکیورٹی وجوہات کی بنیاد پر کئی اسپتالوں نے اپنی طبی سرگرمیاں زیر زمین منتقل کردی تھیں تاکہ مریضوں اور عملے کی جانیں محفوظ رہیں۔

یاد رہے کہ یہ واقعہ ایک ایسے وقت میں پیش آیا جب ایران اور اسرائیل کے درمیان کشیدگی عروج پر ہے اور حیفا ان شہروں میں شامل ہے جو ایرانی حملوں کا ہدف بنے ہیں۔

اسپتال انتظامیہ کا کہنا ہے کہ زیر زمین وارڈز کو اس انداز سے بنایا گیا ہے کہ وہ جنگ یا حملے کی صورت میں بھی طبی سہولیات کی فراہمی جاری رکھ سکیں۔

خیال رہے کہ اسرائیل میں کئی بزدل شہری ایسے بھی ہیں جو بنکرز سے ہی باہر نہیں نکل رہے اور روز مرہ کی زندگی کے تمام امور وہیں انجام دے رہے ہیں۔

اس سے قبل بنکرز میں شادی کی ایک ویڈیو بھی سوشل میڈیا پر وائرل ہوئی تھی وہیں دوسری جانب ایران کے بہادر شہری اپنی حکومت کے سپورٹ میں سڑکوں پر موجود ہیں۔