سعودی عرب سمیت متحدہ عرب امارات، قطر، کویت، ترکی، شام، اردن، عمان، عراق سمیت دنیا کے متعدد مسلم ممالک میں عیدالاضحیٰ آج مذہبی عقیدت اور احترام کے ساتھ منائی جارہی ہے۔

اس کے علاوہ برطانیہ، امریکہ، کینیڈا اور آسٹریلیا میں مقیم مسلمان بھی آج عید قربان منا رہے ہیں۔

عید کے روز نماز کے بڑے اجتماعات مسجد الحرام اور مسجد نبویؐ میں منعقد ہوئے جہاں لاکھوں فرزندانِ اسلام نے شرکت کی۔

 ان کے علاوہ پورے سعودی عرب میں ہزاروں مساجد میں نمازِ عید ادا کی گئی جس میں مقامی شہریوں سمیت پاکستانی اور دیگر غیر ملکی مسلمان شامل تھے۔

عید کی نماز کے بعد سنت ابراہیمی کی پیروی کرتے ہوئے جانوروں کی قربانی دی گئی، جس کے بعد حجاج نے حلق (سر منڈوانے) کی رسم ادا کی۔

اسلام کے مقدس شہر مکہ مکرمہ کے نواحی علاقے منیٰ میں لاکھوں حجاج نے رمی جمرات (شیطان کو کنکریاں مارنے) کی رسم ادا کی۔

اس سے قبل حجاج نے جمعرات اور جمعے کی درمیانی رات مزدلفہ میں کھلے آسمان تلے قیام کیا اور وہاں سے رمی کے لیے کنکریاں جمع کیں۔

گزشتہ روز حج کے رکنِ اعظم، وقوفِ عرفہ کے موقع پر مسجد نمرہ میں خطبہ حج دیا گیا، تاہم اس دوران مسجد الحرام کے امام، شیخ ڈاکٹر صالح بن عبداللہ نے خطبہ حج میں مسلمانوں پر اتحاد، تقویٰ اور حقوق العباد کی اہمیت پر زور دیا، خطبے میں خاص طور پر فلسطین کے مظلوم مسلمانوں کے لیے دعاؤں کی اپیل بھی کی گئی۔

دنیا کے 100 سے زائد ممالک سے آئے عازمین حج اس موقع پر موجود تھے، جنہوں نے ظہر اور عصر کی نمازیں ایک ساتھ ادا کیں اور رات مزدلفہ میں گزاری۔